Congo: Marcel Ntsourou yakatiwe kuzakora imirimo y’agahato ubuzima bwose

Urukiko rwo mu gihugu cya Congo Brazzaville rwakatiye Marecel Ntsourou wari umuyobozi wungirije mu rwego rushinzwe ubutasi, akaba yashinjwaga kurema inyeshyamba no guteza umutekano muke imbere mu gihugu, ibi bikaba aribyo byatumye akatirwa kuzamara ubuzima bwe bwose akora imirimo y’agahato kuri uyu wa kane tariki ya 11 Nzeri 2014.

Mu isomwa ry’urubanza, abandi bantu 50 bareganwaga bakatiwe ibihano biri hagati y’imyaka irindwi na 15. Abandi bagera kuri 50 bakekwagaho ibyaha harimo n’umugore wa Marecel Ntsourou bagizwe abere.

Uyu mugabo wabaye Coloneli mu ngabo za Congo Brazzaville yatawe muri yombi tariki ya 16 Ukuboza 2013 nyuma y’imirwano ikarishye yahuje inyeshyamba n’ingabo za leta mu murwa mukuru Brazzaville.

Urukiko ruburanisha ibyaha, rwahamije Ntsourou ibyaha byo kurema inyeshyamba, gutunga intwaro z’intambara mu buryo butemewe, ubwicanyi, gukubita no gukomeretsa ku bushake no kurema umutwe w’abagizi ba nabi, gusa ntiyahamijwe icyaha cyo guhungabanya leta.

Marcel Ntsourou wari mu nzego z’ubutasi (CNS), yagize uruhare rukomeye mu gusubiza ku butegetsi Perezida Denis Sassou Nguesso, mu mwaka wa 1997, nyuma y’intambara hagati y’abenegihugu.

Uyu mugabo wari umaze igihe kinini ku ipeti rya Coloneli, yategereje imyaka isaga 10 ko yagirwa Jenerali ariko araheba, bituma abika inzika kuri Perezida Nguesso. Col Ntsourou yashinjwe kugira uruhare mu iturikwa ry’ububiko bw’intwaro buri hafi y’urugo rwa Perezida mu 2012, abasaga 300 bahasize ubuzima.

Marcel Ntsourou, mbere yo gufatwa muri 2013, yabanje kuburana inshuro ebyiri, ubwo mu 2005 yagirwaga umwere ku bijyanye n’amahano yiswe, ‘Des disparus du Beach’ ubwo impunzi z’abaturage b’iki gihugu cya Congo 350 baburirwaga irengero nyuma yo gutahuka bava mu buhungiro mu 1999.

Muri 2013, bitewe n’iturika ry’ububiko bw’intwaro bwa Mpila, yaje gukurwa muri gereza nyuma yo gufungwa umwaka n’igice by’agateganyo, akaba yarakatiwe gukora imirimo y’agahoto imyaka itanu (y’insubikwa) nyuma kiza kongerwaho gufungwa imyaka itanu muri gereza.

Jeuneafrique

UM– USEKE.RW