Congo Brazza: Abanyarwanda babayo bakiriye Dr.Habyalimana nka Ambasaderi mushya

*Dr Habyalimana Jean Baptiste ahagarariye u Rwanda mu bihugu bitandatu byo muri Africa yo hagati,

*Congo Brazzaville ibamo Abanyarwanda benshi harimo n’abahunze mu 1994, ngo icyo azakora ni ukubunga,

*Mu byo yavuze byamujyanye harimo no gushishikariza Abanyekongo gushora imari mu Rwanda.

Ni umuhango wabaye ku wa gatandatu tariki 30/1/2016 mu mujyi wa Brazzaville, aho Diaspora Nyarwanda muri Congo Brazzaville yasabanye na Ambasaderi mushya, Dr Jean Baptiste Habyalimana, uzaba uhagarariye u Rwanda muri iki gihugu.

Mme Ernestine URABARUTA, uhagarariye Abanyarwanda baba muri Repubulika ya Congo Brazzaville, yavuze ko bumvise ko hafunguwe Ambassade muri iki gihugu, byarabashimishije kuko hari bimwe mu bibazo bagiraga ubu bigiye gukemuka.

Yakomeje avuga ko muri Congo kimwe n’ahandi, hakiri Abanyarwanda batavuga rumwe ku Rwanda bishingiye ku mateka.

Yavuze ko banejejwe no kuba babonye Ambassaderi ufite uburambe muri gahunda y’ubumwe n’ubwiyunge, akaba ari na yo mpamvu badashidikanya ku kuba azabakemurira ibibazo.

Mu ijambo rye Amb.Habyalimana Jean Baptiste, ati “Numvise benshi bafata Ambasade nk’aho ibereyeho bamwe igasiga abandi, ariko nagira ngo mbamenyeshe ko yafunguye imiryango kugira ngo yakire buri Munyarwanda wese uyigana, nta yindi nkomyi.”

Yakomeje avuga ko Umunyarwanda uwo ari we wese naho yaba yarakoze Jenoside, ashobora gusubizwa ubwenegihugu (Ubunyarwanda) bwe akazabazwa ibyo yakoze nyuma.

Dr Habyalimana yasobanuye impamvu u Rwanda rufite Ambasade muri Congo Brazzaville mu bice bitatu: icya mbere ni uko ibihugu byombi bifitanye umubano mwiza, ikindi ni ukugira ngo hashimangirwe imikoranire n’ubufatanye hagati y’ibihugu byombi, harimo gushishikariza ba rwiyemezamirimo bo mu Rwanda bakaza gushora imari muri Congo Brazza n’abo muri Congo bakajya gushora imari mu Rwanda.

Icya gatatu nngo ni ugufasha Abanyarwanda benshi baba muri iki gihugu bifuza gusubirana Ubunyarwanda bahoranye ndetse banavukanye.

Yasobanuye kandi ko “Politiki iriho ari uko buri Munyarwanda wese abona ubwenegihugu bwe, uburenganzira bwe ndetse n’umuti w’ibibazo byose yaba afite bikabasha gukemurwa n’u Rwanda ndetse n’Abanyarwanda.”

Yasabye Abayarwanda baba muri Congo Brazzaville bose kunga ubumwe, kuko ntacyazabagora muri gahunda zose zijyana n’iterambere.

Ambasaderi Habyalimana, ahagarariye u Rwanda muri Congo Brazzaville no mu bindi bihugu ari byo: Gabon, Cameroun, Tchad, Guinee Equatorial na Centrafrique.

Adeline Musema

UM– USEKE.RW