Col. Cobra Matata: « ndi muzima, sinapfuye»

“Ni jyewe Colonel Cobra Matata ubavugisha, FARDC yarabeshye ngo yaranyishe” kuri telephone kuri uyu wa kabiri nibyo yatangarije radio okapi dukesha iyi nkuru.

Col Cobra Matata umuyobozi wa Front de Résistance Patriotique de l’Ituri (FRPI), byatangajwe n’ingabo za Congo ko zamwivuganye tariki 29 Nzeri.

Col. Matata Banaloki bita Cobra yavuze ko impamvu yaje kwitandukanya n’ingabo za Congo agasubira mw’ishyamba, nyamara bari bumvikanye kuvanga ingabo, ari uko Kinshasa itigeze irekura bagenzi be bafunze nkuko bari babyumvikanye.

Nyuma nibwo yahise yiyemeza kuva i Kinshasa agasubira mu Ishyamba Ituli, kongera kuyobora umutwe wa FRPI urwanya leta ya Kinshasa. Akaba ariyo mpamvu ingabo za Kabila ngo zihora zifuza ko yicwa, kugeza n’aho babeshya ko yarashwe.

Ushinzwe ingabo za Congo mu karere ka Ituli colonel Fal Sikabwe yatangaje kuwa mbere tariki 03,  ko ingabo ayoboye zarashe Col Matata mu mirwano zerekana n’amwe mu mashusho y’iyo mirwano yabereye mu karere ka Ituli mu mpera za Nzeri mu burasirazuba bwa Congo Kinshasa.

Colonel Fal Sikabwe watangaje urupfu rwa Col Cobra Matata abajijwe icyo avuga kuri uyu Cobra Matata wavuze ko ari muzima, yagize ati: ” Sinatangaje ko Cobra Matata yapfuye, nerekanye amashusho agaragaza umurambo wuwo twakekaga ko ari Cobra Matata”

Cobra Matata ni inyeshyamba imwe mu zikangwa cyane na Leta ya Kinshasa, kuko afite gushyirahamwe gufatika ugereranyije n’indi mitwe irwanira muri Congo.

Jean Paul Gashumba
UM– USEKE.COM