Clinton na Trump batsinze, Bush ava mu rugamba rwa White House

Mu matora y’ibanze muri Leta ya South Carolina umuRepublican Donald Trump yatsinze abo bahatanye naho muri Leta ya Nevada mu ba Democrate Hillary Clinton aratsinda. Ku ruhande rw’AbaRepublican ariko Jeb Bush yahise ava mu guhatana nyuma yo kubona amajwi atageze no ku 8%.

Trump yatowe cyane muri South Carolina, bacye nibo batoye Senateri wa Leta ya Texas Ted Cruz. Donald Trump yabonye amajwi 32,5% akurikirwa na Senateri wa Leta ya Florida Marco Rubio (22,5%) na Ted Cruz (22,3%).

Ku mwanya wa kane aha mu baRepublicains haje Jeb Bush wagize amajwi 7.8% gusa. N’amarira ku maso Jeb Bush yahise atangaza ko avuye mu byo guhatanira kujya muri White House.

Nubwo bwose muri campagne ye yari yashoyemo miliyoni 89$ Jeb Bush ntiyigeze abasha kubona amajwi kurusha ayo yabonye muri Iowa aho yabaye uwa gatandatu ku rutonde no muri New Hampshire aho yabaye uwa kane.

Mu ba Democrates Clinton na Sanders rurageretse

Senateri wa Leta ya Vermont Bernie Sanders ari kugenda yigarurira cyane cyane urubyiruko kuko aribo ari kuvanamo amajwi menshi.

Hillary Clinton w’imyaka 68 wabashije gutsinda Sanders muri Leta ya Iowa aho yabaye uwa mbere, yongeye kumutsinda no muri Nevada muri iyi week end abona amajwi 52,6% naho Sanders abona 47,4% by’abatoye.

Bernie Sanders w’imyaka 74 yemeye ko yatsinzwe aha Nevada gusa avuga ko yizeye cyane urubyiruko ruri kumuha amahirwe menshi mu matora ko ruzakomeza kumushyigikira agahigika Hillary.

Aba bakandida urugamba rwabo ruzakomeza tariki 01 Werurwe 2016 aho bazatorerwa muri Leta ya Texas mu kitwa “Super Tuesday”.

Muri aya matora y’ibanze hagati ya tariki 1/2/2016 kugeza mukwa 06/2016, ari kubera muri Leta 50, District of Columbia n’ahandi k’ubutaka bwa Amerika buri hanze yayo.

Aya ni amatora aziguye (indirect) aho abatora bahitamo abahagararira amashyaka mu matora ya Perezida. Batora kandi abazajya kubatorera Perezida (presidential electors) ari bo batora visi perezida na perezida wa USA.

UM– USEKE.RW