Choeur de Kigali ihagarariye u Rwanda mu iserukiramuco rya Muzika y’amakorari

Kuva tariki 21 kugera tariki 28  Choeur International et Group instrumental de Kigali (C.I.E.I.K) niyo ihagarariye u Rwanda mu iserukiramuco  nyafurika rya Muzika ishingiye ku makorari  rizabera mu gihugu  cy’u Burundi  Bujumbura.

Choeur international et Group instrumental de Kigali (C.I.E.I.K) igizwe n’abaririmbyi babigize umwuga  bakomoka mu makorari atandukanye yo mu Rwanda .

Amakuru aturuka mu buyobozi bw’iyi Korali aravuga ko ku nkunga ya Minisiteri y’umuco na Siporo  Itsinda rya mbere ry’abaririmbyi bagize iyi CIEIK ryahagurutse kuri uyu  wa 21 Nyakanga aho bitabiriye amahugurwa atandukanye kuri muzika  ndetse bakazafatanya n’abandi bakomotse mu bindi bihugu  kuririmba mu bitaramo bitandukanye  bizabera mu mujyi wa Bujumbura.

Nk’uko bigaragara kuri gahunda yatanzwe n’ubuyobozi  bwateguye iryo serukiramuco, Choeur International de Kigali ihagarariye  u Rwanda izaririmba bwa mbere mu gitaramo cya muzika yo  hambere ishingiye ku manota (classic)  ku mugoroba wo kuwa gatanu tariki 25 Nyakanga.

Aba baririrmbyi bahagarariye u Rwanda kandi bazongera kuririmba ku mugoroba wo kuwa gatandatu tariki  26 Nyakanga mu gitaramo cyatewe inkunga n’ubuyobozi bw’umujyi wa Bujumbura.

Mu minsi bazamarayo kandi biteganyijwe ko abaririmbyi bakomeye ku rwego mpuzamahanga bakomotse impande barimo Dr Philip Brunelle (USA)   Yiga Simon (Uganda), James Varrick , Moshori, Francis NIBON bazafasha abazaryitabira kunoza ubuhanga bwa muzika ishingiye ku makorari.

Chœur International et Ensemble Instrumental de Kigali (CIEIK) igiye ihagarariye u Rwanda igizwe n’abaririmbyi baturuka mu makorari anyuranye mu gihugu, yavutse mu mwaka wa 2006.

Si ubwa mbere iyi Korali ihagarariye u Rwanda mu ruhando mpuzamahanga kuko  yagize uruhare  mu gutegura indirimbo  yubahiriza umuryango wa Afurika y’Iburasirazuba EAC izwi nka “Jumuiya Yetu.”

Mu mwaka ushize wa 2013 CIEIK ni bo baririmbye iyi ndirimbo yubahiriza EAC ubwo hatangizwaga iserukiramuco ry’ibihugu bigize EAC ryari ryiswe JamaFest ryabereye i Kigali.

Mu bindi bikorwa  Choeur international et Groupe instrumental de Kigali  yateguye harimo ihuriro ry’amakorari (Choralie) rya 6 ryakoranyije  amakorari yakoze igitaramo cyo kwibuka  abaririmbyi bo mu bihugu duturanye Kenya, Uganda, RDC hamwe na Korari  zo hirya no hino mu gihugu.

Ni mu rwego rwo kwibuka abahanzi nka Rugamba Cyprien, Sebakiga Alfred, Byusa Eustache, Boniface Musoni na Saulve Iyamuremye bagize uruhare rukomeye mu kwandika indirimbo nyarwanda mu manota.

Ku mugabane wa Afurika ishyirahamwe rihuza amashyirahamwe y’ibihugu  ya Muzika ishingiye ku  makorari  riyobowe n’umunya Kongo Brazaville Eric Rodrigue Fabrice Loembe ari na we watangije igitekerezo cyo kwishyira hamwe mu guteza muzika ya korrali imbere ku mugabane wa Afurika.

Iserukiramuco  nyafurika rya Muzika ishingiye kuri Korari rigiye kubera mu Burundi ni irya gatanu kuva iki  gikorwa cyatangira.

Iry’uyu mwaka ryahawe insanganyamatsiko igira iti: “Pour Afrique Unie et Forte” ugenekereje bikaba bivuga “ Afurika yunze ubumwe kandi ikomeye”.

Iserukira muco riherutse ryari ryabereye muri Togo

UM– USEKE.RW