Chelsea yasinyishije umutoza mushya

Kuri uyu wa gatatu Chelsea FC yemeje ko Andre Villas-Boas ariwe mutoza mushya w’iyi kipe nyuma yo gusinya amasezerano y’imyaka 3 muri iki gitondo.

Uyu mutoza w’imyaka 33 ateye ikirenge mu cya Jose Mourinho wahoze amutoza muri FC Porto nawe wahavuye ajya muri Chelsea.
Andre Villas-Boas aje muri Chelsea kuri £13.2million zatanzwe muri FC Porto, akaba afashe uyu mwanya wari bugufi guhabwa Guus Hiddink nawe wigeze gutoza Chelsea igihe cy’amezi 3.

Itangazo rigaragara ku rubuga rwa Chelsea FC ryanditse ngo: “Andre yari umukandida mwiza kuri uyu mwanya, ni umwe mu batoza beza kandi bakiri bato kuri iyi si, wageze no kuri byinshi mu gihe gito amaze atoza.”

“Twizeye ko azageza Chelsea, ku bintu byinshi cyane cyane mu marushanwa yo kumugabane w’uburayi.”
Andre ntabwo ari mushya mw’ikipe ya Chelsea kuko yigeze kuhakora igihe cy’imyaka 3 ubwo yari muri staff ya Jose Mourinho, ngo biteguye kongera kumwakirana ibyishimo.

Nkuko bisanzwe umutoza ntajya asiga abakinnyi binkoramutima ze, niyo mpamvu Andre Villa ashaka kuzana abakinnyi yatozaga nka rutahizamu Falcao n’ umukinnyi wo hagati witwa Joao Moutinho, abakinnyi bibanze muri FC Porto. President w’iyi kipe  Jorge Nuno Pinto da Costa akaba yahise aha Falcao agaciro ka miliyoni £26.5 z’amapound naho Moutinho £26.5m
Coach Villas Boas kandi ngo ntazasiga umutoza wa pysique (Fitness Coach) Jose Maria Rocha  ndetse n’umuhanga mu kureba abakinnyi bato Daniel Sousa.

Uyu mutoza afite aho ahuriye n’ingoma y’abami ba Portugal, umwami Carlos I  wa Portugal yagize Jose Gerardo de Villas Boas umwami w’agace gato ka  Guilhomil muri Portugal mu 1890, uyu mukambwe akaba ari sekuruza wa Andre Villas Boas umutoza mushya wa Chelsea.

Chris Mexes

umuseke.com/rubavu