CECAFA: Intangiriro nziza y’Amavubi imbere ya Tanzania

Kuri uyu wa gatandatu, umukino wari ukomeye muri CECAFA wahuzaga Kilimanjaro Stars n’Amavubi, warangiye Amavubi abonye amanota atatu  ku gitego kimwe cyatsinzwe na Olivier Karekezi.

Mu mukino ikipe y’umutoza Milutin Sredojevic ‘Micho’ yitwaye neza mu gice cya mbere, aho Amavubi yanateye amashoti abiri agafata imitambiko y’izamu, iki gice cyaje kurangira Captain Olivier Karekezi ahindukije umunyazamu Juma Kaseja (captain wa Tanzania) nyuma yo gucenga myugariro Juma Nyoso ku munota wa 22.

Igice cya kabiri, cyihariwe n’ikipe ya Tanzania yashaka kwishyura imbere y’abafana bayo bari muri Stade y’igihugu, ku munota wa 87 Mrisho Ngassa, yashyize mo igitego ariko abasifuzi bo muri Ethiopia bavuga ko yari yaraririye.

Ba rutahizamu ba Tanzania Mbwana Samatta, Haruna Moshi, Mussa Hassan Mgosi na Thomas Ulimwengu bakomeje kugerageza kwishyura umusifuzi arinda arangiza umukino bitabakundiye.

Abasore nka Nshuti n’amagara Ismael (Kodo) Mbuyu Twite, ndetse na Haruna Niyonzima bakaba bitwaye neza muri uyu mukino.

Amavubi mu itsinda A yafashe umwanya wa mbere, azakina umukino wa kabiri na Djibouti tariki 2 Ukuboza.

Imikino yabanje kuwa gatanu mu itsinda B

Burundi 4-1 Somalia
Uganda 2-1 Zanzibar

UM– USEKE.COM