CAR: Ingabo za RDF zakoze umuganda kuri gereza ya Ngaragba

Ingabo z’u Rwanda zirwanira ku butaka ziri mu butumwa bw’amahoro mu gihugu cya Centrafurika kuwa gatandatandatu tariki 21 Kamena zakoze umuganda wo gusukura gereza ya Ngaragba, iri ahitwa muri Arrondissement 7 mu mujyi wa Bangui.

Uyu mutwe w’ingabo witwa Rwanda Mechanised Infantry Battalion (RwaMechBatt1) uri mu butumwa bw’amahoro ‘MISCA’ ukaba waratewe ingabo mu bitugu n’abapolisi bo muri Centrafurika ndetse n’abajandarume ‘gendarmerie’ n’abayobozi b’inzego z’ibanze mu gusukura ibice bikikije gereza ya Ngaragba.

Ingabo z’u Rwanda zateguye iki gikorwa cy’umuganda zivuga ko cyri kigamije gusukura aho kuri gereza ya Garagba no gusibura umuhanda werekeza kuri Arrondissement 4 aho mu mujyi wa Bangui.

Nyuma y’umuganda ingabo z’u Rwanda zakoranye inama n’abaturage mu rwego rwo kubasobanurira impamvu y’umuganda no kubasobanurira akamaro kawo mu guteza imbere imibereho y’abaturage n’ubukungu bw’igihugu.

Maj Bosco Muhizi aganira n’abaturage yagize ati “Umuganda nka kimwe mu bisubizo by’abatuye igihugu, ukorwa buri wa gatandatu wa nyuma w’ukwezi mu Rwanda ni kimwe mu bigize kwigira, ni imbarutso y’amajyambere no kwihesha agaciro.”

Ingabo za RDF ziri mu butumwa bwo kugarura amahoro muri Centrafurika zatangiye ibikorwa by’umuganda tariki ya 23 Gashyantare 2014, ubwo hasukurwaga ahantu hakikije ibigo bya gisirikare babamo ariko mu ntumbero yo kwagura ibyo bikorwa bikagera ku nzego z’ibanze no ku baturage basanzwe.

Geraza ya Ngaragba irinzwe n’ingabo z’u Rwanda zifatanyije n’abajandarume bo muri Centrafurika ikaba iri mu mujyi wa Bangui.

MOD

ububiko.umusekehost.com