Cameroun: Ingabo za leta zishe aba Haram 100 zibohoza abantu 900
Ingabo za Leta ya Cameroun ziravuga ko zishe abarwanyi bagera ku 100 ba Boko Haram
Kuri uyu wa gatatu Minisiteri y’ingabo ya Cameroun yatangaje ko mu bikorwa byo kurwanya intagondwa zo muri Nigeria zo mu mutwe wa Boko Haram ngo Ingabo za leta zishe abarwanyi 100 b’uyu mutwe, banabohoza abantu 900 bari barafashwe bugwate na Boko Haram.
Byatangajwe na Joseph Beti Assomo Minisitiri w’ingabo wa Cameroun kuri radiyo y’igihugu kuri uyu wa gatatu.
Ati “Operation yo kurandura Boko Haram yarangiye muri week end ku mupaka wa Nigeria, twishe abarwanyi 100. Ingabo zacu kandi zashoboye kubohoza abantu 900 bari barafashwe bunyago, zibasha no kwigarurira uduce twari turi mu maboko y’aba barwanyi.”
Mu gihe aya makuru yatangazwaga na minisiteri y’ingabo ya Cameroun abantu batandatu bahitanwe n’ibitero bibiri by’ubwiyahuzi byakorewe igihe kimwe muri iki gihugu.
Biravugwa ko ibi bitero byagabwe mu gace ka Waza hafi y’umupaka wa Nigeria ubwo abantu babiri biturikirizagaho ibisasu, abakekwa ni aboherejwe n’umutwe wa Boko Haram.
Ibi bitero byakajije umurego guhera mu kwezi kwa Nyakanga. Aho byibasiye cyane agace k’amajyaruguru ya Cameroun ahegera Nigeria.
Camerroun nayo iri mu bihugu byiyemeje gushyira hamwe ngo bibashe kurandura umutwe wa Boko Haram, wayogoje kiriya gice ndetse ukaba waramaze gutangaza ko ari ishami rya Islamic State muri aka gace.
Callixte NDUWAYO
UM– USEKE.RW
English