Café Litéraire: Gael Faye yashimishije abayitabiriye barimo na J.Kagame

Mu gitaramo cy’ubuvanganzo cyaraye kibereye mu nzu rusange y’ibitabo ku Kacyiru umuhanzi Gael Faye yamuritse igitabo cye ‘Petit Pays’ kivuga ku mateka ye akanyuzamo akanaririmba. Ni umugoroba wanyuze cyane abawitabiriye bagera nko kuri 300 barimo na Mme Jeannette Kagame na Minisitiri Julienne Uwacu.

Ni igitaramo cyatangiye mu masaha ya saa moya cyarimo abantu benshi bakunda ubuvanganzo no gusoma, harimo kandi abahanzi nka Cecile Kayirebwa, Diogene Ntarindwa bita Atome, abanditsi b’ibitabo nka Alain Gauthier n’abakinnyi ba filimi nka Carole Karemera.

Igitabo Gael Faye yamuritse kivuga muri rusange ku buzima bw’umwana wavukiye mu Burundi se ari umufaransa waje mu kazi nyina ari umunyarwandakazi wari warahahungiye.  Mu by’ukuri ni we ubwe.

Yagisobanuye avuga ku mateka yaciyemo akiri umwana, avuga uburyo “Petit Pays” (Burundi) yari nka paradizo kuri we n’inshuti ze, aho ngo mu uwakuramutsaga wese akubaza amakuru wamusubizaga ko ari ‘meza’.

Avuga uburyo nyuma byaje guhinduka nabi kubera amacakubiri mu Burundi ndetse no mu Rwanda ibintu bikamera nabi ibi bihugu bikajya mu kaga.

Mu gitabo cye avuga uburyo yagize ibibazo kubera amacakubiri yaba muri Africa ndetse n’Iburayi aho bahungiye bavuye i Burundi kuko we yari avanze.

Gael Faye yabikoraga mu buryo bwa gihanzi na gisizi, akanyuzamo akaririmba indirimbo ze zituje z’amagambo asobekeranye gihanga yumvikanamo inganzo nka ‘Patit pay’, ‘Pili Pili sur un Croissant au Beurre’ n’izindi..

Yavuze uburyo byamugoye kumenya ukuri ku mateka y’amacakubiri mu Burundi no mu Rwanda. Agaragaza ko umurongo u Rwanda rufite ubu utimika amacakubiri aho umuntu yaba ava hose.

Igitabo Patit Pay yagisohoye mu 2016, kiza mu bitabo bikunzwe cyane mu Bufaransa.

Callixte NDUWAYO
UM– USEKE.RW