CAF: AS Kigali yakomeje muri 1/8 kuri Penaliti

Umukino mpuzamahanga wa CAF Confederation Cup wo kwishyura wahuzaga ikipe ya As Kigali na Ahly Shandi warangiye ikipe ya As Kigali itsinze penalite 5-4,umukino waberaga I Shendi mu gihugu cya Sudan kuri uyu wa gatanu tariki 07 Werurwe.

Mu mukino waranzwe n’ishyaka ryinshi ku mpande zombi, ikipe ya Ahly Shandi yaje kotsa igitutu ikipe ya As Kigali iza no kubona igitego kimwe byatumye iminota 90 y’umukino irangira ariyo iyoboye umukino kuri icyo gitego kimwe ku busa.

Kuko i Kigali naho ariko byari byagenze AS Kigali ibatsinda 1-0, nyuma y’uko mu mikino yombi amakipe anganyije 1-1 hitabajwe za Penaliti.

Ikipe ya AS Kigali yabashije gutsinda Penaliti 5 kuri 4 za Ahly Shandi yari mu rugo.

AS Kigali muri 1/8 izacakirana n’ikipe izava  hagati  ya Difaa Hassani El Jadidi yo mu gihugu cya  Maroc cyangwa Gamtel (Gambia Telecommunication Company) yo muri Gambia zo zizakina ku cyumweru tariki ya 9 werurwe. Difaa El Jadidi irahabwa amahirwe yo gukomeza kuko mu mukino ubanza muri Gambia yahatsindiye ikipe ya Gamtel ibitego 2 – 0.

Ikipe ya As Kigali ntagihindutse ishobora  kugera  i Kigali ku cyumweru mu masaha y’umugoroba.

AS Kigali ni ikipe yubakiye ku bakinnyi ahanini bahoze muri Academie ya SEC bazanye n’umutoza Cassambungo waje asimbura Thierry Hitimana ubwo iyi kipe yari igiye kumanuka.

Nyuma yo gutsinda ikipe yo gusezerera ikipe ya Academie Tchité y’i Burundi, ikipe ya AS Kigali ibashije no gusezerera Al Ahly Shandi yo muri Sudan.

Hagati ya 21-23 Werurwe ikipe ya AS Kigali nibwo izakina umukino wa mbere wa 1/8 wa CAF.

Jean Paul Nkurunziza
ububiko.umusekehost.com