Bwa mbere Carnegie Mellon University Rwanda yasohoye abayirangijemo

Kigali – Abanyeshuri 22 barangije ikiciro cya gatatu cya Kaminuza mu ishami ryo mu Rwanda rya Kaminuza ya Conegie Mellon University mu bijyanye n’ikoranabuhanga. Aba nibo banyeshuri ba mbere bo mu Rwanda barangije mu ishami ryo mu Rwanda ry’iyi Kaminuza iza ku mwanya wa 24 muri Kaminuza zikomeye ku Isi.

Dr Vicent Biruta wari ukiri Ministre w’Uburezi mu gihe uyu muhango wariho uba, yavuze ko u Rwanda rwishimiye ko ikigo nk’iki gikomeye mu burezi mu ikoranabuhanga kiza gukorera mu Rwanda none kikaba uyu munsi gisohoye abanyeshuri ba mbere.

Jean Pierre Munyadusenge urangije amasomo muri iyi kaminuza yavuze ko ari ibyishimo bikomeye kuri we kuko amasomo iyi kaminuza itanga kuyakurikira neza no kuyatsinda atari urugendo rworoshye.

Ati “Ni Kaminuza yigisha ku buryo budasanzwe, dutangiye amasomo twabonye ko nta mikino. Byari ubwa mbere mu buzima bwanjye ntangira gutaha saa sita z’ijoro, hari n’igihe natahaga saa cyenda cyangwa saa kumi za mugitondo kuko byadusabaga kwiga cyane.”

Jean Pierre avuga ko ubu ari ibyishimo kuba barangije bakabona impamyabumenyi y’iyi kaminuza iri mu zikomeye ku Isi. Bakaba bagiye gukoresha ubumenyi bwabo mu gufasha u Rwanda gukomeza gutera imbere mu ikorabuhanga.

Jean Pierre avuga ko uko bari abanyeshuri 22, icyanda muri bob amaze gushinga kompanyi zabo ndetse babonye inkunga ya 20 000$ bakaba bagiye gutanga imirimo ku rundi rubyiruko, ari nako bakoresha ibyo bavanye muri iyi kaminuza.

Jean Pierre agira inama urubyiruko rwize iby’ikoranabuhanga gusaba kwiga muri iyi kaminuza kuko utsinze ibizamini batanga ari umunyarwanda bamurihira 100% y’amafaranga y’ishuri mu gihe uwo muri aka karere ka Africa y’Iburasirazuba yiyishyirira 50% iyo abashije gutsinda ibyo bizamini.

Dr Biruta yasabye aba banyeshuri barangije gukoresha ubumenyi bahawe bihangira imirimo ishobora guha bagenzi babo akazi mu by’ikonabuhanga.

Prof Bruce H.Khrog uyobora ishami ryo mu Rwanda ry’iyi Kaminuza yavuze ko u Rwanda ari amahirwe rufite muri Africa kuba Carnegie Mellon ihari ngo ihe ubumenyi bwo ku rwego rwo hejuru abana b’abanyarwanda ku buntu.

Ati “Biradushimishije cyane kuba dusohoye bwa mbere abanyeshuri 22, Twakoze byinshi kugira ngo bafate inzira nyayo. Aba hari byinshi bazahindura ku ikoranabuhanga mu Rwanda.

Uyu muyobozi yavuze ko bifuza gufasha u Rwanda mu rugendo rurimo mu kuzamura ikoranabuhanga no kubaka ejo heza h’igihugu gishya.

Iyi Kaminuza yatangiye mu Rwanda mu 2012, mu kwezi kwa 11 uyu mwaka iratangira kubaka ikicaro cyayo i Masoro mu karere ka Gasabo aho kizuzura mu 2016 mu kwezi kwa munani.

Photos/D S Rubangura/UM– USEKE

Daddy Sadiki RUBANGURA
UM– USEKE.RW