Burundi: Umuhanzi Tresor Pascal Nshimirimana yishwe

*Umuhanzi Tresor Pascal yishwe na Police ngo ku bw’impanuka
*Umuyobozi w’Urubyiruko mu ishyaka FNL nawe wishwe ibye ntibyavuzweho
Mu mpera z’iki cyumweru i Bujumbura hongeye kugaragara imirambo y’abishwe babiri, naho kuri uyu wa mbere humvikanye urusaku rw’amasasu hanaturika ibisasu bine biremereye. Mu bishwe harimo umuhanzi Tresor Pascal. Ni nyuma y’agahenge kari kamaze iminsi micye.

BBC ivuga ko mu murwa mukuru hagati haturikiye ibisasu bine ariko ngo inzego z’umutekano ntiziratagaza abo byahitanye,abakomeretse ndetse n’ibintu byaba byangiritse. Ariko ngo abari baharo babonye abapolisi baterura inkomere bazishyira mu modoka y’ikamyo.

Umuvugizi w’igipolisi yavugiye kuri radio y’igihugu ko bari buze kubitangaza nubwo atavuze igihe.

Mu bantu babiri baherutse gusanga bishwe muri iyi week end ishize harimo umuhanzi mu bya muzika Pascal Tresor Nshimirimana.

Uyu Nshimirimana nawe yagaragaye mu myigaragambyo yo kwamagana manda ya gatatu ya perezida Nkurunziza ngo umurambo we watoraguwe ku Musaga hafi ya gereza ya Bujumbura.

Ni nyuma yuko yari yatawe muri yombi n’inzego za polisi.

K’urupfu rwuyu munyamuziki polisi y’igihugu yavuze ko yashatse kwambura imbunda umupolisi maze ngo yicwa n’isasu rwasohotse mu mbunda ku bw’impanuka.

Uyu murambo watoraguwe nyuma y’undi murambo w’umusore witwa William Nimubona wari umuyobozi w’urubyiruko rwa mw’ishyaka FNL riyobowe na Agathon Rwasa.

Urupfu rwuyu muyobozi w’urubyiruko nta kintu igipolisi kigeze kibivugaho.
Callixte Nduwayo
UM– USEKE.RW