Burundi : Leta yateguye imyigaragambyo yamagana ko hoherezwa ingabo

Guverinoma y’u Burundi yateguye imyigaragambyo y’abaturage bagiye mu mihanda muri week end ishize bamagana ko muri iki gihugu hoherezwa ingabo nyafrica zo kugarura amahoro.

Iyi myigaragambyo yabaye n’ahandi hatandukanye muri buri Ntara y’u Burundi aho abayobozi bakuru b’igihugu bari bigabye kugira ngo abaturage bayitabire ari benshi.

Gaston Sindimwo Visi Perezida wa mbere yari mu bigaragambya muri Bujumbura hagati hamwe n’urubyiruko rw’abatwara za moto n’amagare mu mujyi aho bazungurutse imihanda ya Bujumbura barinzwe cyane n’ingabo.

Visi Perezida wa kabiri w’igihugu we yari yerekeje mu Ntara ya Bubanza aho avuka.

Aha bose baririmbaga indirimbo zamagana icyemezo cy’Umuryango wa Africa yunze ubumwe cyo kohereza ingabo mu Burundi bavuga ko bashaka gusa ingabo z’u Burundi iwabo.

I Burundi kuva mu kwezi kwa kane 2015 abantu hafi 300 bamaze kwicwa naho abarenga ibihumbi magana abiri babaye impunzi mu bihugu bituranyi.

Muri week end yabanjirije iyi ishize, habaye ubwicanyi bukomeye ku baturage bukozwe n’ingabo na Police kubo bita ko barwanya Leta.

UM– USEKE.RW