Burera: Ukuriye ibiro by’ubutaka yatawe muri yombi akekwaho ruswa

Dusabimana Sylidio ukuriye ibiro by’ubutaka mu karere ka burera ari mu maboko ya police y’igihugu aho akurikiranyweho ibyaha byo gutangira ibya Leta ubusa na ruswa nk’uko byemezwa n’umuvugizi wa police mu ntara y’Amajyaruguru CIP Andre Hakizimana.

Dusabimana kugeza ubu afungiye kuri station ya police ya Rusarabuye mu karere ka Burera mu gihe iperereza ku byaha akurikiranyweho rigikomeza.

CIP Hakizimana ati:”Akurikiranyweho gutangira ibya Leta ubusa bishobora kuba bifitanye isano na ruswa. Ibyatanzwe ntabwo twabitangaza kugira ngo bitangiza iperereza rigikomeza kugeza ubu.”

Mu gihe yaba ahamwe n’iki cyaha cyo gutangira ibya leta ubusa yahanwa n’ingingo ya 643 mu gitabo cy’amategeko ahana ivuga ku ihanwa ry’isonera ritemewe n’amategeko.

Iyi ngingo ihanisha usonera binyuranije n’amategeko,utanga ku buntu cyangwa ku gaciro kadakwiriye umutungo wa leta cyangwa uw’ikindi kigo igifungo kuva ku mezi atandatu kugera ku myaka ibiri n’ihazabu yikubye kuva ku nshuro ebyiri kugeza ku 10 y’agaciro k’ibyasonewe, ibyatanzwe kubuntu cyangwa ibyatanzwe ku gaciro kadakwiriye cyangwa kimwe muri ibyo bihano.

Naho mu gihe yaba ahamwe na ruswa yahanwa n’ingingo ya 634 ivuga ku gusaba no kwakira indonke kugirango umurimo ukorwe yahanisha igifungo kuva ku myaka 2 kugera ku myaka 5 n’ihazabu yikubye inshuro kuva kuri 2 kugera ku icumi by’indonke yatanzwe cyangwa kimwe muri ibyo bihano.

Placide HAGENIMANA
UM– USEKE.RW