Bugesera: Abahanzi bahatanira PGGSS II basuye imfubyi n’abapfakazi

Kuri uyu wa mbere tariki 16 Mata, abahanzi bari guhatana mu irushanwa rya Primus Guma Guma Superstar II basuye impfubyi n’abapfakazi ba Genocide yakorewe abatutsi mu 1994 bo mu karere ka Bugesera mu murenge wa Nyamata akagali ka Nyamata Ville.

Aba bahanzi baganiriye n’abasuwe bo mu mudugudu wa Rwakabirizi II, babashyikiriza inkuga z’ibiribwa nk’umuceri, isukari, amavuta yo gutekesha n’ibikoresho nk’amasabune hanyuma bamwe baranabaririmbira.

Umwe mu basaza bashyikirijwe inkunga n’abahanzi yavuze ko iki gikorwa we atumvaga ko cyakorwa n’abana nka bariya, we avuga ko atanazi. Cyakora ngo yumva abana b’aho hafi bavuga ngo “Jipoli” (Jay Polly), uyu mukambwe akaba yishimiye ko nibura hari abantu bibuka ko aho iwabo hari imfubyi n’abandi bashegeshwe na Genocide bakeneye ubufasha no kwegerwa muri iki gihe.

Jean Pierre Uwizeye ushinzwe ikinyobwa cya Primus muri Bralirwa, yabwiye abasuwe ko Bralirwa na East African Promoters babazaniye aba bahanzi mu rwego rwo kubereka ko bifatanyije nabo muri ibi bihe iyi miryango yasuwe yibuka abayo bishwe muri iki gihe mu 1994.

Uyu muyobozi muri Bralirwa, akaba yabwiye cyane cyane impfubyi zasuwe ko zigomba gukora cyane kugira ngo ejo hazaza hazo hazabe heza.

Mu gusoza iki gikorwa, abahanzi nka Young Grace, King James, Emmy na Dream Boyz baririmbiye abana b’imfubyi n’abaturanyi babo, bigaragara ko baba bakunda cyane aba bahanzi ariko kubabona amaso ku maso ari amahirwe babona gacye cyane.

Aba bahanzi basuye aba bana b’imfubyi n’abapfakazi nyuma y’icyumweru kimwe basuye inzibutso za Genocide za Nyamata na Ntarama nazo ziri mu karere ka Bugesera.

Plaisir Muzogeye
UM– USEKE.COM