Bonane: Nyanza Inka 26 nizo zabazwe mu kurangiza 2011

Muri iyi minsi mikuru isoza umwaka, abacuruzi bo mu mugi wa Nyanza badacuruza ibyerekeranye n’ibiribwa batangaje ko ntamafaranga bari kwinjiza, bitewe n’uko abaguzi bari kwibanda kubyo kurya. Abenshi bakibanda mu guhaha akaboga n’ibindi bigendana nako.

Gusa n’ubwo ibiribwa biri kugurwa cyane kurusha ibindi bicuruzwa,ibiciro ntibyigeze bihinduka, kuko abaturage nabo barushaho kubigeza mu masoko ngo bazatangire umwaka bafite amafaranga yo kwifashisha mu bikorwa byabo.

Ku isoko ryo Kurwesero,abacuruza inyama z’inka,ubundi bashoboraga kubaga inka imwe ku munsi,kandi bikanashoboka ko yarara.

NDAHIMANA Anastasie, umwe mu bahacururiza inyama avuga ko kuwa gatadantu tariki 30 Ukuboza 2011,babaze inka enye kandi zose ziragurwa zirashira.

NDAHIMANA agira ati:″iyi minsi idusigiye ifaranga, ariko niyo tuba duherutse kuko indi minsi hari ubwo inka imwe idashira.″

Icyakora abacuruzi b’inyama z’inka bavuga ko n’ubwo ibiciro bidahinduka, ku masoko ibiciro by’amatungo biba byarazamutse. Nk’inka yaguraga 100.000Frw irageza ku 120.000frw.

Uretse ku isoko ryo ku Rwesero hacururijwe inka enye zigashira, mu yandi mazu acururizwamo inyama mu mujyi  wa Nyanza, inka 16 nizo zacurujwe naho ahitwa i Mugandamure hacururizwa inka esheshatu.

Haba mu bacururiza ku isoko cyangwa mu mazu yabigenewe,ikilo k’inyama zivanze (cangacanga) kiragura 1700frw naho iroti ikagura 2000fw. Gusa ntibibuza gusanga abandi baguzi bagura izidanditse bitewe n’uko bishoboye.

Uretse inka zabazwe ku bwinshi ugereranije n’indi minsi isanzwe, muri uyu mujyi abacuruza inkoko nabo bemeza ko zabuze, kuko n’izo abaturage bazindukanye zahise zishira.

NGENZI Thomas
UM– USEKE.COM