Bona yakiriwe n’abahagarariye u Rwanda muri Canada

Bonaventure Uwizeyimana umukinnyi w’umunyarwanda uherutse kubona ikipe akinamo yabigize umwuga muri Canada yaraye yakiriwe n’abahagarariye u Rwanda muri Canada. Mu mpera z’ukwezi gushize nibwo yakiriwe mu ikipe ya LowestRates cycling team yaho.

Bonaventure yakiriwe na Shakilla K.Umutoni ushinzwe ibikorwa muri “High Commission of Rwanda” muri Canada hamwe n’abandi bakozi n’inshuti.

Bonaventure niwe munyarwanda wa mbere muri Canada ugiye gukina umukino wo gusiganwa ku magare nk’uwabigize umwuga mu ikipe isanzwe ikomeye.

Frédérick Gates umuyobozi wa Lowest Rates Cycling Team yabwiye urubuga rw’iyi kipe ko Bona ari umukinnyi basinyishije igihe gikwiye kuko bari bamukeneye cyane.

Umwaka ushize Uwizeyimana yari umukinnyi w’ikipe ya Dimension Data for Qhubeka Pro Team.

Uyu musore aherutse kweguka na Rwanda Cycling Cup agace kitiriwe kwibuka muri uku kwezi, azatangira akazi gashya muri Kamena yitabira amasiganwa abiri muri Canada; Grand Prix de Saguenay na Tour de Beauce.

Lowest Rates Cycling Team yamenyekanye mu Rwanda muri Tour du Rwanda 2016 ubwo yegukanagamo ‘etape’ ebyiri ibifashijwemo na Rugg Timothy ubu ukina muri BikeAid Stradalli.

Kuwa kane tariki 08 Kamena nibwo Bona azatangira isiganwa rye rya mbere n’ikipe ye muri Canada mu isiganwa ryitwa Grand Prix Cycliste de Saguenay 2017.

Roben NGABO
UM– USEKE.RW