Boko Haram yerekanye amashusho ya ba bakobwa yashimuse

Kuri uyu wa mbere umutwe uvuga ko ugendera ku mahame y’idini ya Islam wa Boko Haram werekanye amshusho y’abakobwa bagera ku 130 washimushe mu majyaruguru ya Nigeria tariki 14 Mata.

Umuyobozi wa Boko Haram Abubakar Shekau yatangaje ko aba bana bazakomeza gufatirwa kugeza igihe abasangirangendo ba Boko Haram bose bafunguwe.

Ministre w’Umutekano muri Nigeria Abba Moro yavuze ko uku kugurana kudashoboka ko nta kumvikana n’umutwe w’iterabwoba gushobora kubaho.

Aba bakobwa berekanywe bambaye bikwije nk’abagore b’abisilamu, batatu muri bo bavugira abo bagenzi babo.

Aba bakobwa bavuga, babiri bavuga ko bari abakilistu ariko bakaba barayobotse idini ya Islam undi umwe we avuga ko asanzwe ari umusilamu, ni mu mashusho y’iminota 27 yatangajwe mbere na AFP.

Abubakar Shekau muri aya mashusho ati “Aba bakobwa, aba bakobwa mwitayeho cyane…ubundi baridegembya. Aba bakobwa bahindutse abasilamu.”

Biravugwa ariko ko benshi muri aba bakobwa bashimuswe bari abakilistu nubwo bamwe muri bo bari basanzwe ari abaislamu.

Aya mashusho yerekana aba bakobwa basubiramo imirongo ya Korowani.

Umwe muri bo muri aya mashusho avuga ko batahohotewe. Nta kigaragagaza aho aya mashusho yafatiwe nubwo bisa n’aho ari mu cyaro.

Aba bakobwa ubu ngo baba baraciwemo amatsinda kugirango bibagore gutoroka. Boko Haram ivuga ubundi ko aba bakobwa batakabaye bari ku ishuri ahubwo bakabaye barashyingiwe.

Boko Haram ijambo rivuze “Inyigisho z’abo mu burengerazuba ni ikizira” yatangiye ibikorwa byo kurwanya Leta ya Nigeria kuva mu 2009.

Aba bakobwa bivugwa ko baba ubu bahishwe muri Leta ya Borno hafi y’umupaka wa Chad cyangwa Cameroun.

Leta ya Nigeria yanenzwe cyane ubushobozi bucye mu gukurikirana no gushakisha aba bakobwa bamaze ukwezi hafi barashomuswe bavanywe mu ishuri bigagamo.

Ibihugu by’Iburayi na Amerika bisa n’ibyahagurukiye gufasha Nigeria guhangana na Boko Haram no gushakisha aba bakobwa. Gusa ukwezi kurashize ababyeyi babo barira basaba ko bafashwa kubona abana babo.

Reba amashusho y’aba bakobwa yagaragajwe.

 

ububiko.umusekehost.com