Bigenda bite mu muhango wo Gukwa?

Kuva mu bihe bya kera abageni bitwaga ba Mukobwajana,Mutumwika n’andi mazina aganisha ku nka bikaba bigaragaza rero ko ababaga bafite inkwano kuko hari n’abasabaga abageni ariko nta nkwano bafite, bakwaga Inka cyane cyane kuko nta mafaranga yabagaho.Muri ibi bihe tugezemo byo bakwa inka,amasuka, amafaranga; abatabifite bagatenda.

Uwo muhango wagendaga ute ?

Iyo inka bakoye yageraga iwabo w’umukobwa ; baheragako bakayirasa, ikiremve bakakirya, yaba ikamwa bakayikama, bakayinywa amata, ngo ejo batazavaho bibagirwa bakayikamira undi batari bayinywa, ngo kirazira. Umuntu wakoye inka, hanyuma agapfusha sekuru cyangwa nyirabukwe, iyo bajyaga kumwerera, batumizaga amata ya yanka, ngo na yo ize kwera, kuko iyo nka batayizanye ngo amata yayo acundwe mu yandi y’ubwere, ngo bacaga ukubiri na yo, nta muntu w’aho, ari se, ari umwana, wayinywaga amata, ngo barahumanaga; naho iyo yereye hamwe n’andi, amata yayo yaranyobwaga ntakizira.

Abandi b’abatunzi cyane, bazanaga inyana ebyiri, ishashi n’intoya. Bagahitamo inkuru, intoya igasubirayo, ikazagaruka iherekeje umugeni.

Inyana bajyaga gukwa, barayicaniraga, iyo yageraga iwabo w’umukobwa, musaza w’umukobwa yazanaga icyansi akayikama agapfuriramo ubwoya, ngo ni amata, agahereza se w’umukobwa. Birumvikana ko mu by’ukuri, nta mata iyo nka yabaga ifite, ariko byabaga ari ukurangiza uwo muhango wo kuzaba imbyeyi.

Uwazaga gusaba, yicaraga mu mfuruka yo haruguru, usabwa umugeni akicara mu mfuruka yo hepfo, abandi bazanye n’usaba babicazaga mu muryango no mu rugo.

Iyo usaba yageraga aho agiye  nijoro, yicaranaga na nyir’urugo mu kirambi, abandi bazanye na we, ntibarenge inkingi ya mbonabihita, babicazaga mu muryango.

Mu batunzi, ni inka yajyaga gutebutsa, ikagenda yitwa n’inkwano. Abatebutsaga barayijyanaga bagera hafi y’urugo bagatuma bakabitegura, bagasasa ibirago; byarangira bakabahamagara, abagore n’abakobwa bari aho bakabasanganiza impundu. Bagahabwa inzoga nyinshi; nuko…

Usaba ati: “Maze iminsi, mwarabajije, none nimumbwire niba munyima munyime, niba mumpa mumpe “.

Nyir’urugo ari we nyir’umukobwa ati: ” Nakubwiye ko nzabaza abavandimwe n’inshuti, none barampakaniye ngo nta cyo twigeze dupfa, umugeni ni uwawe nta handi tuzamushyingira; icyakora ni muto, ntarakura wigira ubwira “.

Usaba ati: “Urampemukiye, kandi ari byo twari twarasezeranye, n’inzoga zirahiye, nararangije, none se ko wari wambwiye ko uzabaririza, aho none nta cyaha nzira ?  Unsezerere ahubwo.”

Nyir’umukobwa ati: ” Genda umare iminsi umunani “.

Usaba ati: “Sinarindira iminsi umunani, ni ukunyangiriza, inzoga zahiye, natoye abakwe ibyanjye nabirangije, ntegeka cyangwa unsezerere njye ahandi “.

Nuko se w’umukobwa ati:” Noneho jya gushaka inkwi ejobundi nzagushyingira, ejo uzanyoherereza inzoga ya nyina w’umwana y’ikizeneko “.

Usaba agataha akajya kwitegura; bukeye akohereza inzoga y’ikizeneko. Nyir’umukobwa akabatumaho ati: “Ndabashyingira iri joro “.

Abandi babanzaga kuvugana umunsi wo gutebutsa; mu gitondo bakohereza inzoga zo kwirirwa banywa ngo n’iyo kuvuga ko ejo batazanywa amazi. Nimugoroba bakajyana inzoga eshatu, bakazinywa; mu gicuku bakaza gutongana, bakabwirana amagambo mabi cyane, bagaterana ibishirira; bakishima ngo bashyingiye abagabo bazabarwanaho. Mu gitondo bakababwira igihe bazabashyingirira.

Gukwa no gutebutsa iyo byarangiraga, babazaga igihe cyo gushyingira, bakakivuga. Iyo icyo gihe cyajyaga kugera, bahuraga amasaka, bagasya bagasabika, bagasembura, bagashigisha, bagatora n’abaherekeza babyitayeho. Baraye bari bushyingire bakiboneza bose, iwabo w’umuhungu n’iwabo w’umukobwa. Mu gitondo cya kare kare, boherezaga inzoga ya nyina mu ntango ngo n’iy’icyimutso cyangwa iy’ikizeneko.

Uwajyanaga iyo nzoga ya nyina w’umukobwa, ntawe baramukanyaga, kandi ntiyatahaga iwe, ngo adatanga umukwe kwegerana n’umugore ngo akaba amwiciye ibyara. Iyo nzoga ni yo yahagurutsaga umukobwa, ndetse ngo baranyuranaga.

Mu gihe bahagurutsaga umugeni, bajya kumwambika, batumizaga inzoga y’urwambikiro. Uzanye inzoga y’icyimutso yagiraga ati: ” ngo ni ubwa none“. Bati: ” Ubukwe ni ubw’ejobundi nta bukwe budasibira. ”

Igihe  isaba ryabaga rirangiye ndetse n’inkwano zatanzwe, bariteguraga bakubaka inzu, ikabumbirwa, igakingwamo insika. Nuko bakenga bagashigisha inzoga, zamara gushya, bakajya gutebutsa.

Gutenda byo ni muhango ki ? byakorwaga nande ?

Iyo wasabaga umugeni udafite inkwano waratendaga.

Byakorwaga kera n’umuhungu w’imfubyi utagira icyo asabisha, ntagire n’inkwano yo gukwa.

Abana b’umugabo warongoye adakoye inka, ntiyizeraga ko abana abyaye ari abe, ndetse n’umugore yasaga nk’aho atari uwe kuko atakowe. Umugore iyo yashakaga kwahukana,yajyanaga n’abana iwabo. Abo bana bitwaga inkuri, kuko nyina atakowe. Uwo mugore iyo yabaga adashatse gusubira ku mugabo we, yagumanaga abana be iwabo. Ndetse iwabo iyo bashakaga kumushyingira ahandi uwo mugabo utaramukoye, nta rubanza yabigiriraga. Iyo yareshywaga, umureheje akamukwa inka, habaga ubwo sebukwe amumuhanye n’abana, iyo yabaga amugiriye ubuntu. Iyo atabumugiriraga kandi, sekuru yagumanag abana be, akabirerera, akazabashyingira.

Umukobwa utarakowe, iyo yagumanaga n’umugabo we, ntibatane, bakabyarana abana, iwabo bakuragamo umwe bakamujyana, uwo mwana akitwa umuramu, ngo baramuramuye, kuko nyina atakowe.

RRM
UM– USEKE.COM