Betting: Sports4Africa yahagaritswe, hari abo isize itishyuye

Minisiteri y’Ubucuruzi, Inganda n’Ibikorwa by’Umuryango wa Afrika y’Uburasirazuba yasohoye itangazo rihagarika by’agateganyo kompanyi ikora ibyo guteega ku mikino (betting) yitwa Sports4Africa. Bamwe mu bari abakiliya bayo ariko bavuga ko ibafitiye amafaranga ndetse bariho bayirega ahanyuranye.

Minisiteri y’Ubucuruzi yatangaje ko mu igenzura yakoze ngo yasanze iyi kompanyi itubahiriza amategeko n’amabwiriza agenda iby’ibi bya betting cyane cyane kutishyura abatsindiye kuntego zatanzwe.

Remy Bimenyimana umwe mu bakiliya ba Sports4Africa yabwiye Umuseke ko kuva tariki 03 z’uku kwezi we na bagenzi be benshi bakoresha uburyo bwa Online mu kubetting muri iyi kompanyi batakibasha kwinjira kuri konti zibaho amafaranga yabo.

Konti zabo ziba ziriho amafaranga bifashisha bakora betting banatsinda bakayabashyiriraho.

Bimenyimana ati “Kuva mu ntangiriro z’uku kwezi bafatiriye amafaranga yacu kandi mbere washoboraga kuba wayavanaho ukayashyira kuri Mobile Money ukayakoresha n’ikindi.

Twumvise ngo bagiranye ibibazo na Leta byo kutishyura imisoro y’ibya Online Betting ariko kuva bafatira ayacu n’ubu tugerageza kubabaza ntubone uwo uvugisha, telephone z’abashinzwe abakiliya ntizicamo n’umurongo w’ubuntu bagira ubu nturiho.”

Bimenyimana avuga ko abafite ikibazo nk’icye ari benshi kuko abakoraga Betting Online bagendaga baba benshi kubera kwanga kwirirwa bajya aho iyi mikino ibera.

Mu gihe Umuseke wageragezaga kuvugana na ba nyiri iyi kompanyi kuri uyu wa kabiri nibwo hasohotse itangazo rya  Minisiteri y’Ubucuruzi rihagarika by’agateganyo iyi kompanyi ya Sports4Africa ngo “hanononsorwe ubucuruzi bwayo bugomba gukorwa ntawe bubangamiye.”

Mu kwezi kwa 12 umwaka ushize, i Muhanga abantu batsindiye amafaranga ku mikino imwe n’imwe i Burayi nabo bari bareze iyi kompanyi ko yanze kubishyura amafaranga batsindiye.

UM– USEKE.RW