Basketball: u Rwanda rwongeye gutsindwa na Egypt 76-66

Madagascar, Antananarivo – Ikipe y’igihugu ya Basket yongeye gutsindwa n’ikipe ya Misiri amanota 76 – 66, mu mukino wo gushakisha umwanya (classement) wabaye kuri uyu wa kane. Ni nyuma yuko rutsinzwe muri 1/8 (Round of 16) na Cote d’Ivoire ku manota 80 – 72 y’u Rwanda.

Mu mukino u Rwanda rwakinnye na Cote d’Ivoire kuwa kabiri, rwatangiye rukina neza, ndetse rukaza kurangiza uduce dutatu (Quart temps) ruri imbere, ntabwo rworohewe n’iminota yanyuma.

Cote d’Ivoire y’umusore Edi Guy wanatsinze amanota menshi muri uyu mukino (34pts) yaje gutsinda u Rwanda mu gace ka nyuma k’umukino.

Ikipe y’umutoza Vecislav, ntabwo yabuze ubuhanga mu gutera amanota atatu, kuko muri aka gace ka nyuma babuze menshi cyane.

Umukinnyi usanzwe uzamura umupira (Meneur) Matt Miller ntiyagaragaye kuri uyu mukino kubera imvune, byatumye aka kazi gakorwa na Hamza Ruhezamihigo afatanyije na Kenneth Gasana.

Kenneth Gasana niwe watsinze amanota menshi ku ruhande rw’u Rwanda 30pts, Hamza Ruhezamihigo 13pts, Kami Kabange 12pts.

Muri 1/4 (Quarter Finals) ikipe ya Cote d’Ivoire izakina n’ikipe iza gutsinda hagati ya Senegal na Madagascar zigiye gukina mukanya.

Naho u Rwanda rukazakina n’iza gutsindwa hagati Senegal na Madagascar (iri mu rugo) mu mikino yo gushaka umwanya mu makipe 16 ahari. (Match de Classement)

u Rwanda rusezerewe na Cote d’Ivoire iza ku mwanya wa 36 ku isi, ku rutonde rwa FIBA, mu gihe u Rwanda ruri ku mwanya wa 65 kuri uru rutonde.

Mu marushanwa ya FIBA Africa Championship aheruka kubera muri Libya mu 2009, u Rwanda rwari rwaje ku mwanya wa 9. Mu gihe ikipe ya Cote d’Ivoire yari yabaye iya kabiri, itsinzwe na Angola ku mukino wanyuma.

UM– USEKE.COM