Basketball: IPRC South yatsinze Patriots BBC mu mukino wa 3 wa Playoffs

Patriots BBC yatwaye igikombe cya shampiyona yatsinzwe na IPRC South amanota 67-72, byongerera amahirwe gutwara igikombe cya playoffs iyi ikipe yo mu majyepfo.

Umukino wa nyuma wa gatatu muri Basketball Playoffs, wahuzaga Patriots BBC yatwaye igikombe cya shampiyona, na IPRC South bagihanganiye, wabereye kuri Petit Stade i Remera mu ijoro ryo kuwa gatanu.

IPRC South yatangiye umukino irushwa na Patriots BBC. Kapiteni Ally Kazingufu na Elie Kaje ba Patriots BBC bagaragazaga urwego rwo hejuru mu gace ka mbere, byatumye bagatsinda 19-15 ya IPRC yo mu Majyepfo.

Charles Mushumba utoza IPRC yakanguye abasore be bagerageza gusatira bashaka kujya imbere mu manota. Ariko biranga Patriots BBC ikomeza kuyobora kuko agace ka kabiri karangiye ari 33-32.

Muri quarter ya gatatu n’iya kane, abasore nka Rukundo Felix na Niyonsaba Barnabe bakoresheje imbaraga nyinshi, bashobora kugarira neza, byatumye Mugabe Aristide atigaragaza cyane muri uyu mukino. Banatsinda amanota menshi byazamuye ikipe yabo.

Sammy Munyandamutsa ni umusore w’ikipe ya IPRC South wigaragaje cyane mu kuganira no gutsinda amanota akenewe muri uyu mukino.

Felix Rukundo nawe wa IPRC South yayifashije cyane mu kugarira no gukora za ‘rebounds’, ibintu byazahaje rwose ikipe bari bahanganye.

Umukino wa gatatu wa muri ‘PlayOffs finals’ warangiye IPRC South itsinze Patriots BBC 72-67.

IPRC yiyongereye amahirwe yo kwegukana igikombe cya PlayOffs mu gihe yatsinda umukino wa kane uri kuri iki cyumweru, kuko bamaze gutsinda imikino ibiri, naho Patriots BBC itsinda umwe, kandi bakina imikino itanu.

Kuri iki cyumweru tariki 10 Nyakanga 2016

Saa 16h: Game 3 Playoffs, IPRC Kigali vs Espoir BBC (Bahatanira umwanya wa gatatu)

Saa 18h: Game 4, IPRC South vs Patriots

Kuwa gatanu tariki 15 Nyakanga 2016

Saa 20h: Umukino wa gatanu niba ari ngombwa (mu gihe Patriots yaba yatsinze Game 4)

Roben NGABO
UM– USEKE.RW