Balotelli kuri Noheli yasengereye abanywi inzoga za 1000 £, ahita ajya mu Misa

Mu ijoro ribamo misa y’igitaramo cya Noheli, amasaha make mbere ya misa, Mario Balotelli yinjiye mu kabari i Manchester maze asengerera abo ahasanze inzoga z’amapound 1 000 (hafi miliyoni y’amanyarwanda)

Aka kabari akavuyemo, Balotelli yahise ajya hafi aho mu misa y’igitaramo cya Noheli, aho ngo yatuye (gutura) £200 mu gihe cyuwo muhango wo mukiriziya Gatulika.

Abanywi yasanze muri aka kabari ngo batunguwe no kubona akinjiyemo, ni akabari ko ku rwego rwo hasi cyane muri quartier ya Peel Hall, kadakwiye umukinnyi wagaciro ka miliyoni 24£

Umwe mu basengerewe yabwiye The sun ubwo yinjiraga mo ntawiyumvishaga ko ariwe koko, “ buri wese yaratunguwe, yinjiye yiturije, ubona ntanicyo yitayeho by’abandi ba ‘star’, buri wese yashaka kumuvugisha, ukabona ntacyo bimutwaye ndetse akanagurira ubishaka”

Aka kabari ntiyakamazemo umwanya munini, kuko yahise yerekeza mu kiriziya cya Mutagatifu Yohani aho hafi, mu misa y’igitaramo cya Noheli. Muri iyi kiriziya nayo iciye bugufi,  ngo niho umutoza we Roberto Mancini nawe yumvise misa nkiyi ya Noheli umwaka ushize.

Ngiyi imwe mu mpamvu uyu mukinnyi yibazwaho byinshi, akora ibitandukanye nibimenyerewe, akora kandi ibyo utamukekera ku myaka 21 gusa. We ati: “Why Always Me?”

Ubwanditsi
UM– USEKE.COM