“Ba rwiyemezamirimo n’abatechnicien batanga amasoko bahana ruswa” – Tranperency Rwanda

Mu bushakashatsi umuryango wa Transparency International Rwanda washyize ahagaragara kuri uyu wa gatatu tariki 27 Kamena ku bijyanye n’imitangire y’amasoko ya Leta mu turere, wagaragaje ko ba rwiyemezamirimo bapiganirwa amasoko n’abatechnicien b’Uturere bayatanga hagaragaramo ruswa ku mpande zombi.

Ubu bushakashatsi bugaragaza ko ku ba technicien b’uturere, ari nabo batanga amasoko, ruswa igaragara bwa mbere mu gihe hari gushirwaho ibyangobwa n’ibindi bisabwa rwiyemezamirimo ugomba guhabwa isoko.

Transparency Rwanda ivuga ko ufite uwo mwanya wo kugena ibisabwa agendera kubyo rwiyemezamirimo ashaka guha isoko (cyangwa babivuganye) yujuje neza, agashyiramo n’ibindi byangombwa binaniza kandi bica intege abandi ba rwiyemezamirimo batumvikanye.

Ibi ngo akenshi bikurikirwa no kubona itangazo rihamagarira ba rwiyemezamirimo gupiganwa rigiye ahagaragara habura iminsi mike cyangwa amasaha mu gihe uwo bashaka guha isoko we aba yarabimenyeshejwe hakiri kare ku buryo ahita atanga ibyo bisabwa mu gihe abandi igihe cyo kubishaka kiba ari gito kiri bubakuremo banabibonye.b

Kubwa Transparency Rwanda ngo mu gihe amabahasha y’abatanze ibisabwa nayo yafunguriwe mu bwiru nta washidikanya ko byaba bitatewe na ruswa ku batanga isoko kugirango bo ubwabo bagene uwo bagomba guha isoko.

Iyi ruswa kandi ngo igaragara cyane mu kugenzura ishyirwamubikorwa ry’amasoko nkuko byatangajwe na Apollinaire Mupiganyi, Umunyamabanga nshingwabikorwa wa Transparency Rwanda.

Nyuma yo kubona ibyavuye muri ubwo bushakashatsi butunga agatoki inzego z’ubuyobozi bw’uturere mu gutanga amasoko ya Leta kenshi bishingiye kuri ruswa, umuyobozi mukuru w’ishyirahamwe ry’uturere n’umujyi wa Kigali RALGA Karake Theogene yasobanuye ko kuba ruswa yagaragara ku batanga amasoko biterwa n’impamvu z’ubumenyi n’ibikoresho bike ku bakozi b’uturere ariko impamvu nini ikaba ari umushahara muto uhabwa abo bakozi.

Ku ruhande rwa ba rwiyemezamirimo dore ko nabo batungwa agatoki n’ubu bushakashatsi, Papias Kazawadi uyobora ishyirahamwe rya ba rwiyemezamirimo, abubatsi n’abakora ibikorwa remezo yasobanuyte ko mu gutanga amasoko y’uturere ruswa ishobora kugaragara rwose kuri buri ryhande ariko kuri we ngo ikibabaje ni uko n’iyo habayeho igenzura abayobozi b’uturere bahita bavuga ko ari ba rwiyemezamirimo batindije ibikorwa by’isoko runaka nyamara naba nyiri kuritanga babifitemo uruhare.

Papiyasi Kazawadi aha, nawe asa n’utunga agatoki inzego z’uturere zitanga amasoko, agaragaza ibintu bikunze gutuma rwiyemezamirimo atarangiza isoko bitewe n’abarimuhaye.

Biteganijwe ko nyuma yo kumva kimwe ibyavuye muri ubu bushakashatsi, harebwa ingamba n’uburyo burambye bwo kurwanya ruswa mu gutanga amasoko ya Leta.

Ubu bushakashatsi bwibanze ahanini ku masoko atangwa n’uturere mu bijyanye n’ubwubatsi n’ibikorwa remezo.

Ubu bushakashatsi buri gukorwa no mu bindi bihugu nka Kenya, Zambia, Uganda na Tanzania ku nkunga ya Bank y’isi igamije kunoza imitangire y’amasoko ku Isi hose

Daddy SADIKI RUBANGURA
UM– USEKE.COM