Ba Pasitoro (Pastors) muri Nigeria bakize nk’abacuruzi ba Peteroli

Aba pasitoro muri Nigeria imitungo yabo ngo yaba ibarirwa muma miliyoni y’amadorali, ubukungu bwabo ngo burangana n’ubwabaherwe bacuruza za peteroli cyangwa amabuye y’agaciro.

Ibi byatangajwe na Nsehe Mfonobong umwanditsi wa Forbes Magazine yandika ku bijyanye n’imitungo y’abantu kw’isi.

Ivugabutumwa ngo ni Business ikomeye cyane ukurikije imitungo ya bano bayobozi b’amatorero muri Nigeria, ngo hari aba pasitoro 5 bonyine bafite imitungo bose hamwe ibarirwa muri miliyoni 200$.

Mr Nsehe yatanze urugero rwa Bishop David Oyedepo uyobora itorero rya Living Faith World Outreach Ministry ngo niwe, muri aba bakozi b’Imana bafite indonke nini bakuramo, ukize kurenza abandi bose kuko umutungo we ubarirwa muri miliyoni 150$ z’amadorari.

Bishop David uyu ngo ntiyagarukiye mu masinagogi gusa kuko afite Kaminuza ye, inzu isohora ibitabo, amashuri yisumbuye akomeye, indege 4 (Private Jets) ndetse n’imiturirwa y’amazu i Londres na New York.

Bishop David ngo ni gake wamubona agenda mu modoka nabwo z’igiciro gikomeye, ubundi agenda n’indege ye gusa, ajya kubwira ubutumwa bwiza indushyi n’abakene ko ingoma y’ijuru iri bugufi.

Mu bandi ba pasitoro bakora iyi Business yo kubwiriza inkuru nziza bakize kurenza abandi muri Nigeria ni:

• Temitope Joshua Matthew wa  Synagogue Church Of All Nations we ngo yaba yibitseho Miliyoni hagati ya $10m na $15m
• Matthew Ashimolowo wa Kingsway International Christian Centre ukabakaba miliyoni  $6 cyangwa $10 ndetse na
• Chris Okotie uyobora the Household of God Church nawe ngo ari hagati ya miliyoni  $3 na $10 z’idorali.

Mr Nsehe watangarije iyi nkuru BBC avuga ko abo bagabo ndetse n’abandi benshi bakorera Imana usanga bagenda mu madege yabo (Private Jets) cyangwa mu mamodoka y’igiciro, avuga ko aba bagabo imitungo yabo bayikura ahantu hatandukanye, gusa ngo abenshi usanga igishoro cyabo ari abagana insengero zabo.

Mu Rwanda naho bivugwa ko ba Pasitoro bamwe na bamwe bamaze kuba abaherwe kubera ahanini iyi Business idahomba kereka Umwami Yesu n’agaruka.

Sinkunda gusoma Bibiliya cyane ariko hari abo numvise bavuga ngo “Umukire kwinjira mu bwami bw’ijuru ni nk’ingamiya kwinjira mu rushinge” None byaba ari uko aba bagabo bazajya he ra?

Jean Paul Gashumba

Umuseke.com