Ayman al-Zawahiri wasimbuye Ben Laden yasabye abanya Algeria guhirika Boutefrika

Muri Video yashyizwe ahagaragara kuri uyu wa gatatu n’imbuga za Internet za kisilamu, umunyamisiri Ayman al-Zawahiri ubu uyoboye umutwe wa Al-Qaïda, yasabye abaturage ba Algeria gufata urugero rw’abanyalibya nabo bagahirika ubutegetsi bwa Boutefrika.

Dr Ayman al-Zawahiri, muri iyi Video yafashwe hagati y’ukwezi kwa 8 n’ukwa 9, yashimiye abaturage ba Libya ko bahiritse umunyagitugu Mouammar Khadaffi, gusa abasaba kwitonda kuko OTAN ngo ari agatsiko k’abo mu burengerazuba bw’isi bagamije gusenya idini ya Islam.

Yasabye abayoboye Libya ubu, kwitonda mugihe bazaba bita izina leta nshya, abasaba kuzashingira Libya nshya ku idini ya Islam n’itegeko rya Shariah, ntibumve ibyo OTAN ibabwira nubwo yabafashije mu ntambara yo guhirika Khadaffi.

Al Zawahiri,59, umugabo ufite agatwe gahenze kurenza abandi ku isi, dore ko USA yamutanzeho Miliyoni 25$ kuzabasha gumutanga ari muzima cyangwa apfuye, yabonyeyeho gusaba abaturage ba Algeria ko bakwiye guhirika ingoma ya Abdelaziz Boutefrika, nkuko tubikesha Jeuneafrique

Yagize ati: “Banyaligeria, abavandimwe banyu muri Tunisia, Egypt na Libya bajugunye abategetsi b’igitugu babo mu ngarani, kuki mwe mudahagurukira umunyagitugu Boutefrika?”

Uyu mugabo uyoboye umutwe wa Al-Qaïda nyuma y’iyicwa rya Osama Ben Laden mu ntangiriro za Gicurasi uyu mwaka, ari mu bantu bavuga rikijyana, akaba kandi anizeye imbaraga z’umutwe ayoboye zifite abantu benshi muri Africa y’amajyaruguru cyane cyane mu butayu bwa Algeria.

Daddy Sadiki RUBANGURA
UM– USEKE.COM