“Ayiii wa nyanja weeee …” indirimbo ye yatumye bamutoteza ngo akorana n’Inkotanyi

Ntawuhanundi Jean, ni umugabo ugiye kuzuza imyaka 50 y’amavuko, ni umuhanzi utazwi cyane ubu, ariko iyo uvuze indirimbo igira iti “ Ayiii wa nyanja weee watujye nkiyambukiraaa…nkajya gusura ababyeyi…” buri wese utari umwana muto, arayimenya. Niwe wayiririmbye, iyi ndirimbo yamukururiye ibibazo byatumye acika intege n’ubu akaba atagikora muzika n’ubwo ateganya kongera.

Ntawuhanundi yamenyekanye cyane mu myaka ya 1990, 92, 94 kugeza za 98, ni umunyarwanda wavukiye muri Congo kubera amateka, azana n’umuryango we kuba mu Rwanda mu 1976 batura ku Muhima.

Uyu mugabo yubatse urugo mu 1986 arushingira ku Muhima, ubu ni umubyeyi w’abahungu babiri n’abakobwa babiri, atuye mu murenge wa Jali mu karere ka Gasabo.

Ibya muzika yabitangiye afungiye muri Gereza ya Kigali izwi nka 1930, impano yo avuga ko yari ayifite mbere mu guhimba no kwandika imivugo n’indirimbo, aha muri gereza ni naho yasohoreye indirimbo inyanja, yamenyekanye cyane na nyirayo agifunze.

Yafunzwe mu Ukwakira 1988 azira ko aho yakoraga hari amafaranga yari yabuze mu gihe yari ‘comptable’, ari muri gereza kubera urukumbuzi rw’abe asohora indirimbo INYANJA mu ntangiriro za 1989.

Iyi ndirimbo yaje gukundwa cyane, ndetse igahora mu zasabwe kuri Radio Rwanda kuva yasohoka kugeza mu myaka ya za 1998. Yatumye amenyekana cyane ariko inamukururira ibibazo kuko Leta y’icyo gihe (mbere ya 1994) yayifashemo politiki.

Ntawuhanundi mu kiganiro yagiranye n’umunyamakuru w’Umuseke yamubwiye ko yafunguwe mu kwezi kwa 10/1990 mu mbabazi zatanzwe kubera uruzinduko rwa Papa Jean Paul II mu Rwanda.

Ati “Navanye muri gereza indirimbo imwe (Inyanja) yari imaze kwamamara hanze njye ngifunze, ariko nasohokanye izindi zirindwi nari naranditse arizo; Musigeho, Akingeneye, Inshuti mbi, Nkir’iwacu, Kanyeshyari, Teganya na Ngarukira. Izi nazisohoye maze kuva muri gereza nkomeza gukora muzika mu kwa gatatu 1992 nsohora Album ya mbere nise INYANJA.”

Ntawuhanundi avuga ko yagurishije cassette z’iyi Album ye zirenga 500 imwe ayigurisha 1 000Rwf,avuga ko yavanyemo inyungu ihagije kuri we, agereranyije n’ayo yayishoyemo.

Ibibazo yatewe no kwamamara

Ati “Indirimbo INYANJA yari inkuru mpamo y’ibyambagaho, ntabwo yari politiki rwose, abasare navugaga bari nk’abayobozi ba gereza, inyanja yari gereza, aho navugaga nti “Kanyamanza kareremba ubantahirize” ni abantu nabaga mbona hakurya ku Muhima na Kimisagara ndi muri Gereza mbabonera kure nkumva nabatuma iwacu. Agahinda nagaterwaga n’uko iwanjye naharebeshaga amaso (hari hafi aho ku Muhima), nkareba abana twareranywe batambuka, nkareba inshuti ariko ntashobora kubasuhuza, niko guhimba iriya ndirimbo INYANJA, ntaho yari ihuriye na politiki.”

Ntawuhanundi amaze kurekurwa ahagana muri za 1992-1992 ubwo yari yamamaye kubera indirimbo ye, yakomeje kujya ahamagazwa n’inzego z’iperereza n’ubutasi asabwa ibisobanuro ku ndirimbo ye INYANJA, ndetse n’izindi muri ziriya zirindwi yasohoye nyuma.

Muri ziriya yasohoye hari iyo yaririmbye avuga (azimiza bya gihanzi) ko amashyaka ari gutuma abantu bacanamo, bakicana ndetse bakanikora munda, avuga no kubo yise Nyakamwe (Abatutsi) icyo gihe ngo batari bafite kirengera na kivugira bicwa buhoro buhoro, akabyamagana mu mvugo ya gihanzi.

Ariko amagambo y’indirimbo yari ikunzwe cyane INYANJA niyo yakomeje kwibazwaho n’inzego z’iperereza.

Mu gitero kigira kiti “ Muryango wanjye uri hakurya y’inyanja…”  nakandi gace gaheruka indirimbo kavuga ngo “Nzagaruka mu bivumu bya data nshire agahinda kigihe kirambuye.”  Aya magambo ngo yayabajijweho kenshi bamushinja ko yaba yaravugaga INKOTANYI bityo ngo akaba akorana nazo.

Ati “Nagiye mpamagarwa kenshi muri Service centrale de renseignement, nyuma baza kumfungisha ijisho mu gihe cy’amezi atandatu ntagomba gusohoka muri Kigali. 

Muri iki gihe mfungishijwe ijisho nahamagawe n’umunyamakuru witwaga Ravi wayoboraga ikinyamakuru KANGUKAtuganira ku by’iyi ndirimbo INYANJA, musobanurira nk’uko ngusobanurira, ambaza ibanga nakoresheje ngo ikundwe n’ibindi ananyemerera ko azayimenyekanisha mu mahanga. 

Nyuma y’uko iyo nkuru isohotse narahamagawe noneho banyemeza ko nkorana n’Inkotanyi kuko ngo nagiranye ikiganiro n’ikinyamakuru bavugaga ko gikorana n’Inkotanyi, ibintu birushaho kunkomerana ndatotezwa, banshyiraho ingenza bambuza no kongera kuva iwanjye mu rugo, bagakurikirana n’abanjye n’abaje kunsira.”

Ibi byamuciye intege zo gukomeza umuziki

Jenoside yahitanye Abatutsi barenga miliyoni, yangiza byinshi mu gihugu, ingaruka zayo ntawe zitagezeho mu Rwanda no ku banyarwanda bari hanze.

Kuri Ntawuhanundi Jean usibye izindi ngaruka zikomeye, we n’umuziki we warahazahariye kuko yacitse intege bikomeye zo gukomeza ubuhanzi bwe.

Ati “ Nakoze muzika ngo nishimishe, nshimishe n’abandi, nshyire hanzi ibiri mu mutima wanjye ariko mpindurwa umunyapolitiki ibi byanciye intege cyane zo gukomeza nyuma ya Jenoside nishakira ubuzima mu bindi, gusa nyuma y’iki gihe cyose ubu ndi gutekereza kugaruka muri muzika kuko ubu mbona nta kibazo cyo gukora umuziki mu Rwanda.”

U Rwanda none, umuziki none, Imana….kuri we

Ntawuhanundi Jean avuga ko umuziki wa none ukennye ibitekerezo. Ati “Ubu abahanzi benshi baririmba ibyo babona uwo munsi, ntabwo bita kuri ejo hazaza. Niyo mpamvu usanga indirimbo isohoka igahita izima mu mezi atatu kuko ibyo yavugaga byarangiye. 

Ariko umuhanzi w’umuhanga areba uyu munsi n’igihe kiri imbere akabihuza. Niyo mpamvu wumva indirimbo zimwe za cyera usanga n’uyu munsi hari aho zicyumvikana, reba nk’indirimbo ya Masabo Nyangezi yise KAVUKIRE, njye nemeza ko idasaza kuko ikomatanyije igihe cye n’icya none.”

Uyu mugabo yabwiye Umuseke ko uruhare rwe muri muzika ya none ari ibitekerezo ku bahanzi babishaka, avuga ko abifuza ko yabafasha mu myandikire no mu gucuranga bijyanye na muzika irambye ishingiye cyane kuri muzika gakondo bamwegera. Uwamukenera ngo yamubona kuri e mail ye [email protected] akamubwira icyo yamufasha nk’umuhanzi.

Uyu munsi Ntawuhanundi abona u Rwanda nk’igihugu cy’amahoro kandi kiri gutera imbere bidasanzwe. Ati “Nk’ikoranabuhanga riri gutera imbere cyane rikorohereza abakora muzika, ariko nanone rigasubiza inyuma ubuhanzi kuko usanga ari imashini (computer) zikora gusa.”

Avuga ko ibi bituma umuhanzi atavunika akora ku ndirimbo ye mu buhanzi no mu gucuranga, akemeza ko ariyo mpamvu wumva indirimbo yo muri Uganda cyangwa i Burundi ugasanga irasa n’izo mu Rwanda bityo bityo. Ibi bikica ikintu cy’umwimerere ukwiye ubuhanzi.

Uyu mugabo avuga ko abonanye na Perezida Kagame icyo yamusaba ari ugutera inkunga umuziki wihariye w’u Rwanda, no gufasha guha agaciro ibihangano nyarwanda ndetse ubivogereye akabihanirwa.

Kuri Ntawuhanundi Jean ubuzima busobanuye kubaho urugendo rurerure rw’umunsi umwe n’undi munsi uwukurikiye bityo bityo, kubaho bikaba kubana neza. Naho Imana avuga ko yemera ni iyaremye byose kandi ishobora byose.

Kuva yasohora iriya Album ye yise INYANJA kugeza ubu nta ndirimbo yongeye gukora ngo asohore, ariko avuga ko afite nyinshi yanditse muri iki gihe cyose gishize, zimwe yazanditse mu gifaransa, izindi mu giswahili no mu Kinyarwanda.

Ubu, nyuma yo kubona ko bikwiye ko zijya hanze ari gushaka ubushobozi bwo kuzisohora zitunganye neza, abamenye ubuhanzi bwe mwitegure kumva indirimbo nka NKUMBUYE IWACU, SOUVIENS TOI n’izindi….ziri mu makayi ariko ari kwitegura gutunganya mu majwi.

Plaisir MUZOGEYE
ububiko.umusekehost.com