Arabia: Umugabo upima 610Kg yajyanywe mu bitaro ku itegeko ry’umwami

Umugabo wo muri Arabie Saoudite witwa Khalid Mohsen Chaïri apima 610Kg ubu ntabwo yari akibasha kuva mu cyumba cye hashize imyaka ibiri irenga arimo ahora. Kuri uyu wa mbere yajyanywe mu bitaro bisabwe n’umwami w’icyo gihugu.

Kugirango avanwe mu cyumba, byasabye gusenya uruhande rw’iki cyumba naho kumumanura muri etage ya kabiri abamo bakoresheje ikimeze nk’ingorofani bashyizeho imigozi ngo kimwururutse.

Umwami Abdallah wa kiriya gihugu yari amaze amezi agera kuri atandatu ategetse ko ajyanwa mu bitaro ariko yararangaranywe.

Arab News yatangaje iyi nkuru ivuga ko ibitaro byo mu majyepfo yoherejweho biherutse kubaga umusore w’imyaka 27  wari ufite umubyibuho ukabije bamukiza ibiro 80 by’ibinure.

Muri kiriya gihugu, umuntu umwe kuri batatu aba afite ikibazo cy’umubyibuho ukabije.

JP GASHUMBA
UM– USEKE.RW