APR FC iri gusatira Rayon Sports

Kuri iki cyumweru, APR FC nayo yatsinze umukino w’umunsi wa munani wa shampionat itsinda Sunrise 2 -1 bituma isatira Rayon Sports ya mbere ubu iyirusha amanota atanu nubwo APR FC inazgamye umukino w’ikirarane.

Kuri uyu mukino waberaga i Nyamirambo, ibitego bya APR FC byatsinzwe na Innocent Nshuti na Michel Rusheshangoga wagitsinze mu gice cya kabiri naho igitego cya Sunrise cyatsinzwe na Cyprien Sinamenye.

Ku munota wa 14 Innocent Nshuti w’imyaka 16 yari afunguye amazamu ku mupira yari ahawe na Janvier Benedata.

Nyuma y’iki gitego amakipe yombi yagiye asatirana ariko ntihaboneka ikindi kugeza ku munota wa 76 ubwo umuzamu wa APR FC yasohokaga Cyprien Sinamenye wa Sunrise akamucenga akinjiza igitego cyo kwishyura umukino ugasubira ibubisi.

Nubwo Sunrise yabonye ubundi buryo nka bubiri bwo gushyiramo igitego cy’intsinzi ntabwo byabahiriye kuko ku munota wa 90 Michel Rusheshangoga yatsinze igitego gitangaje arekuye ishoti nko muri 35m uvuye ku izamu umuzamu za Sunrise akanirwa kuwufata kikajyamo.

Uyu mukino warangiye APR itsinze 2 -1 ihita ifata umwanya wa kabiri n’amanota 17 mu mikino irindwi n’ikirarane kimwe. Ubu iranganya amanota kandi na Police FC gusa APR ikayirusha kuba izigamye ibitego bitandatu indi bitanu.

Indi mukino yabaye uyu munsi:

Kirehe FC 0  – 1 Espoir FC
Etincelles 1 – 3 Kiyovu Sports
Bugesera FC 2-1 Amagaju

Kuwa gatandatu tariki ya 10 Ukuboza 2016:
Rayon Sports 5-2 Gicumbi FC
Police FC 2-1 Pepiniere FC

Kuwa gatanu tariki ya 9 Ukuboza 2016:
AS Kigali 2-0 Musanze FC.

UM– USEKE.RW