APR FC irakoza intoki ku gikombe, Rayon iri gukora ibishoboka

CHIEF EDITOR
04/26/2014

Mu mukino w’umunsi wa 25 ari nawo ubanziriza uwa nyuma, APR FC yongereye amahirwe menshi yo gutwara igikombe ubwo yatsindaga Espoir FC umukino ukomeye i Rusizi 2 – 1. I Nyamirambo Rayon Sports yari yakoze ibishoboka itsinda Esperance ibitego 4 – 0.

APR FC ubu irasabwa gutsinda umukino wa nyuma isigaje na AS Muhanga i Nyamirambo ku cyumweru tariki 04 Gicurasi ubundi igatwara igikombe

Umukino wa Rayon Sports na Esperance i Nyamirambo waranzwe no gusatira kuruhande rw’ikipe ya Rayon sport yasaga nkiyereka abakunzi bayo ko nubwo yahanwe ariko morale ikiri yose.

Esperance wabonaga ikina nta ngufu ndetse binatandukanye n’imikinire yayo isanganywe.

I Rusizi byari bigoye cyane ikipe ya APR kugirango ibashe gukura amanota atatu ku ikipe ya Espoir FC yari yakaniye cyane uyu mukino.

I Nyamirambo ibitego bibiri bya Leon Uwambajimana, igitego kimwe cya Fuad Ndayisenga kuri coup franc, n’igitego cyiza cyane (Garrincha) cya Kambale Salita Gentil waninjiyemo asimbuye umukinnyi Kagere Meddy, byagaragaje gukora ibishoboka kwa Rayon Sports mu gihe cyose APR yari gutsikira i Rusizi cyangwa se yatsikira ku mukino wa nyuma na Muhanga uzaba kuwa 04 Gicurasi.

Umutoza w’ikipe ya Rayon sport Luc Eymael watoje umukino wanone kuko ibihano yahawe atari yabitangira, yavuze ko ashimishijwe nuko abasore be bitwaye kuri uyu umukino.

Abajijwe niba hari icyo yavuga kubijyanye n’ibihano yahawe yavuze ko nta muntu uri hejuru y’amategeko ku buryo atahanwa yongeraho ko ariko kugirango ahanwe hifashishwa ubutabera koko hakerekanwa n’ibimenyetso bifatika.

Ati “Narababwiye ngo banyereke amashusho ndwana n’umusifuzi barayabuze, namwe mwitegereje amashusho (video) mwasanga njye ntakosa nakoze ndetse mwabona ko nanabuzaga abafana gutera mu kibuga amacupa n’amabuye”

Ayo mashusho mwayareba hano

Umutoza wungirije w’ikipe ya Esperance FC yavuze igitumye batsindwa ibitego byinshi ari uko bakinnye n’ikipe ya As Kigali ku wagatatu w’iki cyumweru akabona ko abakinnyi be bari bananiwe.

Ikipe ya APR FC i Rusizi ku buryo bushoboka yongereye amahirwe menshi yo gutwara igikombe cya shampionat uyu mwaka, ubwo izaba ibujije Rayon Sports kugitwara kabiri yikurikiranya.

Ni umukino APR FC yakinanye ishyaka ryinshi kuko itashaka gutakaza, igice cya mbere cyarangiye aya makipe yombi anganya, igice cya kabiri kigitangira Mugiraneza Jean Baptiste bita Migi yaje gutsindira APR FC igitego cy’umtwe ku mupira wari uvuye muri corneri, ariko iki gitego cyaje kwishyurwa ku munota wa 79 w’umukino, maze abafana ba Rayon bagirango Espoir FC ibibafashijemo.

Ibi byishimo bivanze n’igihunga ariko ntibyamaze akanya kuko ku munota wa 81 w’umukino APR FC yabonye coup Franc Rutanga Eric ayitera neza ijya mu rucundura, umukino urangira utyo ari ibitego 2-1.

Mu yindi mikino, Mukura yatsindiwe i Nyamagabe 4-1, Marines itsinda Gicumbi 2-1 mu gihe AS Muhanga yatsinzwe na Police 3-1.

Iyi AS Muhanga niyo mbogamizi ya nyuma isigaye kuri APR ishobora kuyibuza gutwara igikombe, AS Muhanga iramutse ibashije gutsinda APR FC ntiyayibuza igikombe gusa kuko byanayiha amahirwe yo kuba yaguma mu kiciro cya mbere bitewe n’uko amakipe ya Amagaju na Esperance zizitwara kuri uwo munsi wa nyuma.

APR FC ubu ifite amanota 61 ikazigama ibitego 30, naho Rayon Sports ubu ifite amanota 59 ikazigama ibitego 33.

Mu gihe APR izakina na AS Muhanga kuri uwo munsi i Nyamirambo, Rayon Sports izaba yo yakiriye Musanze ku Mumena wa Nyamirambo, hazaba ari ku cyumweru tariki 04 Gicurasi, iki gikombe kikazahabwa imwe muri izi kipe zizaba ziri i Nyamirambo, nib anta gihindutse ku ngengabihe ya FERWAFA….