Amy Winehouse yishwe n’inzoga. 416mg za Alchool kuri 100ml z’amaraso

Ubugenzuzi ku cyateye urupfu rutunguranye rw’umuririmbyikazi Amy Winehouse bwatangaje kuri uyu wa gatatu ko Winehouse yishwe n’inzoga zarenze igipimo mu mubiri we.

Amacupa abiri manini na rimwe rito yashizemo Vodka, byasanzwe mu cyumba basanzemo umurambo wa Winehouse. Izi nzoga ngo ni nyinshi cyane ku buryo zishobora gutuma guhumeka binanirana umuntu agapfa.

Ibipimo byagaragaje ko mu maraso ye kuri 100ml harimo 416mg z’inzoga. Iki gipimo ngo giteye ubwoba ndetse kijyana ku rupfu, kuko byibura igipimo kibi cyane ari 350mg z’inzoga kuri 100ml, aha naho ngo abaharokoka ni bake.

Amy Winehouse wabonetse yapfiriye mu nzu ye tariki 23/07 uyu mwaka i Londres, byabanje kuvuga ko yaba yishwe n’ibiyobyabwenge nka Cracks na Cocaine kuko ngo yakundaga kubikoresha.

Gusa uyu muririmbyikazi ngo sibyo byamwishe ahubwo yishwe n’inzoga nyinshi mu maraso ye dore ko ngo yari amaze ibyumweru bitatu adasoma agahiye.

Uwamurindaga Andrew Morris, niwe wamubonye mbere asinziriye ahagana saa yine za mugitondo, akeka ko nyirabuja asinziriye. Nyamara ngo yari muri Coma, ahagana saa kumi za nimugoroba ku isaha y’i Londres nibwo byamenyekanye ko bitari ugusinzira gusa ahubwo yari yavuyemo umwuka kubera inzoga nyinshi yari yaraye anyoye ataherukaga gusomaho.

Amy Winehouse,27, yapfuye yari amaze iminsi afata imiti imugabanyiriza ibiyobyabwenge bimuri mu mubiri, ariko arenga kuri ibi agotomera izi nziga nyinshi.

Hari kwibazwa icytumye uyu mukobwa w’umwongereza anywa izi nzoga, abaganga batangaje ko byanze bikunze hari ikibazo yari yagize cyamuteye kwiyahuza inzoga.

JP Gashumba
UM– USEKE.COM