Amande ya ‘Forfait’ yavuye ku 100 000 ajya kuri 300 000 muri Basketball mu Rwanda

Mu myanzuro y’Inama rusange y’ishyirahamwe ry’umupira w’intoki wa Basketball mu Rwanda yeteranye kuwa 4 Gicurasi 2013 yafashe umwanzuro ukarishye wo gukuba gatatu amande yo gusiba umukino.

Ubusanzwe ikipe yasibye umukino muri shampionat yaterwaga mpaga ariko ikanacibwa amafaranga ibihumbi ijana (100 000Frw).

Inama rusange ikaba yemeje ko ayo mande akubwa gatatu akaba ibihumbi magana atatu (300 000Frw).

Impamvu yatangajwe ngo ni ukuba amakipe menshi yari asigaye yanga kujya gukina match retour I Rusizi, basangabazamuye amande byatuma bajyayo.

Iyi nama yanzuye ko shampionat ya Basketball izatangira tariki 01/06/2013, amakipe yose asabwa kuba nta mwenda afite (ibirarane bya 2012, no kwandikisha kwa 2013)

Shampionat ishize yegukanywe na Espoir BBC ikaba yarimo ishyaka ku makipe yahatanaga kurusha mu myaka itatu yashize.

Abakunzi ba Basketball mu Rwanda ariko baracyanenga iyi shampionat ko igizwe n’amakipe macye kandi menshi yibereye i Kigali gusa.

Banenga ko kugeza ubu mu ntara z’Uburasirazuba n’Amajyaruguru nta kipe ya Basketball ihaba ikina shampionat bityo bigasa n’aho abakunzi ba Basketball wagirango baba i Kigali gusa.

Ubushinze shampionat yakinwe n’amakipe atagera kuri icumi harimo Ruzisi BBC, NUR BBC, CSK, UGB, 30+, APR BBC na Espoir BBC.

Jean de Dieu Nsengiyumva
UM– USEKE.COM