Amajyaruguru: Imvura yahitanye abantu 6

Ntibisanzwe ko imvura y’umuhindo ihitana abantu, ariko mu turere twa Burera na Musanze abana basaga 6 bahitwanywe n’imvura, ndetse inangiza imyaka myinshi.

Iyimvura yaguye kuwa gatanu no kuwa gatandatu w’icyumweru gishize, yashenye kandi amazu asaga 60, yonona imyaka iri kuri hectare zirenze ijana nkuko tubikesha abaturage baho.

Mu mirenge ya Butaro na Rusarabuye yakarere ka Burera abana b’abakobwa batanu bahitwanywe n’inkangu yagwiriye inzu barimo ubwo iyi mvura yagwaga kuwa gatandatu. Naho undi mwana w’umukobwa we yatembanywe n’umuvu kuri iki cyumweru ubwo yambukaga Urugezi agana mu murenge wa Kivuye. Aba bana bose bashyinguwe kuri iki cyumweru.

Usibye aba bapfuye, iyi mvura yangije kandi ibirayi bihinze kuri hectare zisaga 80 byo mu gishanga cya Kamiranzovu mu murenge wa Cyeru. Imyaka kandi yangiritse mu gishanga cya Mukinga ho muri Musanze, iyi mvura kandi yangije imwe mu mihanda mu ntara y’amajyaruguru.

Aba baturage badutangarije ko imiturire ku misozi ihanamye ariyo ituma bene iyi mvura nyinshi iyo iguye ihitana abantu, ariko ko benshi bakangukiye gutura ahadahanamye ndetse bakahava. Aba bahura n’ibi bibabazo bakaba ari abanangiye kuva ku misozi ihanamye cyane.

Pierre Murara 
UM– USEKE.COM/Musanze