Reba amafoto n'amazina y’abakobwa bashimuswe na Boko Haram

Aba bana b’abakobwa bamaze ibyumweru umunani bashimuswe n’umutwe wa Boko Haram, Isi iri kugenda ibibagirwa. Aya ni amasura yabo n’amazina yabo. Imiryango yabo iracyategereje mu gahinda gakomeye ko hari uwabagarura.

Amafoto y’aba bana yeretswe Gordon Brown intumwa yihariye y’umuryango w’abibumbye mu bya ‘Global Education’. Ubwo yari yasuye umujyi wa Chibok aho aba bana bashimitiwe bavanywe mu ishuri ryisumbuy mu nzu bararagamo.

Kugeza ubu Brown avuga ko yaba Police cyagwa igisirikare cy’aha, ntawari wakusanya dosiye nk’iyi igaragaza amazina n’amafoto y’aba bana.

Uyu mugabo Brown yakoze dosiye y’impuro 185 buri rupapuro rugenewe buri mwana. Abandi bana 19 nibo atarabona amafoto yabo kuko bose hamwe ni 204.

Abakobwa bagera kuri 53 babashije kwiruka bacika abarwanyi b’umutwe wa Boko Haram, aba bacitse ngo ntabwo babashije gukomeza kwiga kubera ubwoba bw’uko bakongera gushimutwa, ndetse ngo ubu babana n’ihungabana nk’uko Brown yabitangarije Mailonline.

Amazina nka Awa, Yohanna, Amina, Zakariya, Ether, Yakubu, Dauda, Nuhu, Haruna, Margaret n’andi ni aya bamwe muri aba bakobwa bashimuswe, bamwe bari basanzwe ari abasilamu abandi atari bo.

Imiryango y’aba bana yatanze uburenganzira ko amasura n’amazina y’abana babo ajya ku mugaragaro kugirango isi ikomeze yifatanye nabo mu gahinda barimo.

Ibihugu by’ibihangange byavugaga ko bigiye gutanga ingabo n’indege kabuhariwe ngo bajye gufasha Nigeria gushaka aba bana aho bahishwe n’umutwe wa Boko Haram.

Leta ya Nigeria yavuze ko itazashyikirana n’uyu mutwe ngo ukunde urekure aba bana, igisirikare cyayo kikanengwa intege nke mu gukurikirana aba barwanyi, kikavuga ko kiramutse kibakurikiranye aba bana bakwicwa ariko kandi Leta ntishake gushyikirana nabo.

Boko Haram isaba ko Leta ya Nigeria yarekura abarwanyi bayo ifite, kandi igaharanira ko amajyaruguru ya Nigeria agirwa Leta yigenga ya kisilamu.

Usibye aba bakobwa, abandi bantu barenga 200 bamaze kugwa mu bitero bikorwa na oko Haram mu majyaruguru ya Nigeria mu minsi itageze kuri 20 ishize.

Impungenge ni zose ku babyeyi b’aba bakobwa, abandi ku isi bo bigaragaza ku mbuga nkoranyambaga bafite ibyapa byanditseho ngo #BringBackOurgirls, ariko ntawuratinyuka kujya kubizanira kuko ababisabwa bo (Boko Haram) ntabyo barakora.

ububiko.umusekehost.com