Ally Kazingufu yahize gutsinda Patriots BBC yari abereye Kapiteni

Remera- Shampiyona ya Basketball irakomeza. REG BBC irakina na Patriots BBC. Ally Kubwimana Kazingufu yahize kwihimura ku ikipe yabereye kapiteni Patriots akayitsinda.

Kuri uyu wa gatanu tariki 16 Ukuboza 2016 harakomeza imikino y’umunsi wa gatatu wa shampiyona ya Basketball mu Rwanda. Umukino w’umunsi urahuza amakipe yageze ku mukino wa nyuma a Pre season, Patriots BBC na Rwanda Energy Group (REG BBC).

Patriots BBC yatwaye igikombe cya shampiyona y’umwaka ushize, yatakaje abakinnyi babiri mubo yagenderagaho; Chris Walter Nkurunziza na Ally Kubwimana Kazingufu wari kapiteni wayo, bombi bagiye muri REG BBC.

Aba basore bagiye gukina n’ikipe bahozemo yanabatsinze amanota 76-75 ku mukino wa nyuma w’irushanwa ryabanjirije shampiyona, Basketball Preseason Tournament.

Kazingufu yabwiye Umuseke ko bahize kwihimura, ati: “Turiteguye. Twashyizemo imbaraga kurusha indi mikino yose twakinnye mbere. Ndumva dufite byinshi duharanira, kuko tugomba kugaragariza abayobozi bau ko turi ikipe ifite icyo ishaka. Ntibyaba byiza rero dutsinzwe na Patriots BBC kabiri mu byumweru bitatu. Abakinnyi bayo turaziranye uraza kuba umukino mwiza.”

Aba basore batozwa na John Bahufite bariyubatse kuko bongeyemo Kabange Kami umunyarwanda wakiniraga City Oilers yo muri Uganda.

Amakipe yombi yatsinze imikino yabo ya mbere. Patriots iheruka gutsinda United Generation Basketball (UGB) amanota 95-34, naho REG yatsinze  Rusizi amanota 93-65.

Kuwa gatanu
18.00- APR BBC vs 30Plus BBC (Petit stade Amahoro)
20.00- PATRIOTS BC vs REG BBC (Petit stade Amahoro)

Kuwa gatandatu
10.00- CSK vs IPRC-Kigali BBC (Petit stade Amahoro)
12.00- ESPOIR BBC vs IPRC-South BBC (Petit stade Amahoro)

Ibiciro byo kwinjira kur iyi mikino
Ahasigaye hose: 1 000 RWF
Hasi hafi y’ikibuga: 2000 FRW
VIP: 5000 FRW

Roben NGABO
UM– USEKE.RW