Algeria: Impanuka y’indege yahitanye abantu 103 biganjemo abasirikare

Iyo ndege yo mu bwoko bwa C-130 Hercules yakoze impanuka kuri uyu wa kabiri mu Burasirazuba bw’igihugu cya Algeria nk’uko amakuru akomeje kugenda abivugaho.

Ibinyamakuru nka BBC, La Libre Belgique ndetse na Dailystar byanditse ko indege C-130 Hercules, yagurukiraga mu burasirazuba bw’umujyi wa Constantine yasandaye bitewe “n’ikirere kitari kimeze neza”.

Iyi mpanuka yabereye ahitwa Oum El Bouaghi, muri km 500 mu Burasirazuba bw’umurwa mukuru, Alger nk’uko byemejwe na radio y’igihugu.

Iyi ndege yari itwaye abantu 99 biganjemo abasirikare mu ngabo z’Algeria n’abantu bo mu miryango yabo, nk’uko ibiro ntaramakuru AFP byabitangaje.

Ikinyamakuru La Libre Belgique cyo mu Bubiligi cyongeyeho ko iyi ndege yarimo n’abantu bane bayikoramo bise uko ari 103 bakaba bayitikiriyemo nta numwe warokotse.

Leta y’Algeria yashyizeho icyunamo cy’iminsi itatu kuva kuwa gatatu kugeza kuwa gatanu tariki ya 14 Gashyantare.

ububiko.umusekehost.com