Al-Qaeda iri gutegura guhorera Bin Laden itoza ba mudahusha

Umutwe w’iterabwoba ku Isi wa Al-Qaeda benshi bibazaga ko wazimye, uri gutoza ba mudahusha (Snipers) mu rwego rwo guhorera umuyobozi wawo Osama Bin Laden wishwe n’ingabo za Amerika n’iz’Ubwongereza.

Uku kwihorera kurategurwa ku ngabo z’Abongereza 9500 ziri muri Afghanistan nkuko ikinyamakuru thesun cyabitangaje.

Amafoto yagaragaye ku mbuga za Internet z’imitwe ishamikiye kuri Al-Qaeda, agaragaza abagabo bari gutozwa kurasa kure hakoreshejwe imunda zabugenewe.

Nubwo aba bagabo bitazwi neza aho baherereye, ngo baba bari kwitoreza mu bice biri ku umupaka wa Afghanistan na Pakistan.

Ibi biragaragaza ko nubwo umuyobozi wa Al-Qaeda Osama Bin Laden yishwe, uyu mutwe ugiteye impungenge Isi, byumwihariko abongereza n’abanyamerika.

Ba mudahusha bari gutozwa bakoresheje imbunda za Dragunov zikorwa n’Abarusiya, zishobora kurasa muri metero 1290.

Ba mudahusha (snipers) bahabwa agaciro cyane muri Al Qaeda, kubera ubushobozi bwabo mu kwica no gukomeretsa abo bahaweho nk’intego.

Impuguke mu iterabwoba Neil Doyle yaraye itangaje ko “abo ari abazanywe (recruitment) ngo bafatwe amashusho bityo bitere akanyabugabo abandi bashaka kwinjira muri uyu mutwe ngo bahorere Bin Laden”

Iyi mpuguke yongeyeho ko Al Qaeda iri kugerageza kwerekana ko ishobora gukomeza kuba ikibazo nubwo benshi bibazako yaciwe umutwe.

Abayobora ingabo z’Abongereza ziri muri Afghanistan nabo bakaba batanze impuruza ko abarwanyi b’Abataliban bari kwiyegerenya n’aba Al Qaeda ngo bakore akantu.

Source: Thesun

Paisir Muzogeye
UM– USEKE.COM