APF mu biganiro ku ngengo y’imari n’Inteko Ishingamategeko y’u Rwanda

Kuri uyu wa kane, intumwa z’Ihuriro ry’Inteko zishinga Amatege z’ibihugu bikoresha ururimi rw’Igifaransa “AFP (Assemblée Parlementaire de la Francophonie)” zatangiye ibiganiro by’iminsi ibiri na Komisiyo ishinzwe ingengo y’imari y’igihugu mu Nteko Ishinga Amategeko y’u Rwanda, umutwe w’Abadepite bigamije gusangira ibitekerezo ku mitegurire y’ingengo y’imari n’ibindi bijyanye nayo.

Mu gutangiza iyi nama, Perezida w’Inteko Ishinga Amategeko umutwe wa Sena Dr. Ntawukuriryayo Jean Damascène yibukije abari muri ibi biganiro ko Guverinoma yemeye ko bibaho kuko yari yiteze ko bazabikuramo ubundi bumenyi buzabafasha mu kazi kabo ko gutegura, kwemezwa, gutora, gukurikirana, kugenzura no gusuzuma ingengo y’imari n’uburyo ishyirwa mu bikorwa.

Ntawukuriryayo yavuze ko ingengo y’imari n’ubwo ari igikoresho cya guverimo yifashisha mu gushyira mu bikorwa gahunda zayo, ariko itegurwa hakurikijwe politiki, icyerekezo, intego n’ibyo igihugu ku nyungu z’abaturage, bityo ngo abagize inteko ishinga amategeko nk’intumwa za rubanda baba bagomba kuba bafite ubumenyi bwo kugenzura neza niba ibyo byubahirizwa uko bikwiye.

Depite Constance RWAKA Mukayuhi, uri muri ibi biganiro asanga ibi biganiro bifite akamaro kanini kuko bibahuza na bagenzi babo bo mu nteko zishinga amategeko z’ibindi bihugu bakungurana ibitekerezo, hanyuma ngo nibirangira bazareba niba hari icyo bakwigira kubyo babazaniye, kimwe n’uko nabo bashobora kwigira ku Rwanda.

Yagize ati “Hari aho twavuye, hari n’aho tumaze kugera, dufite amategeko tugenderaho…iyi nama yateguwe kugira ngo turusheho kwiga kuko kumva abandi imikorere yabo hari ibyo bituzanira, hagamijwe kwigira.”

Ku rundi ruhande Jean Lucien Bussa Tongba, Perezida wungirije wa Komisiyo y’ubukungu n’imari mu nteko ishinga amategeko ya Repubulika Iharanira Demokarasi ya Congo (DRC) avuga ko guverinoma z’ibihugu zikwiye kujya zitegura ingengo y’imari zabanje kureba ibikenewe cyane.

Tongba avuga ko ari akazi k’intego ishinga amtegeko kureba niba byubahirijwe n’ingengo y’imari igashyira mu bikorwa uko yatowe, hakabaho no kugenzura uko byakozwe no guhana abagize uruhare mu bitaragenze neza aho byagaragaye kuko ngo aribyo bituma ibihugu bimwe bitera imbere.

Naho Péjo Philippe, Umujyanama mu bikorwa by’inteko zishinga amategeko muri ‘AFP’we yahakanye abavuga ko ibiganiro nk’ibi biba bigamije kwigisha ibihugu bitaratera imbere ahubwo ngo ni uguhana ibitekerezo kuko ku Isi nta gihugu wavuga ngo uburyo gikora ibintu byacyo nibwo buryo bwiza ibindi byareberaho.

Vénuste Kamanzi
ububiko.umusekehost.com