Adolphe Mutoni ashobora gusinya mu ikipe ya VDK Gent mu Bubiligi

Adolphe Mutoni umaze iminsi mu biruhuko mu Bubiligi ubu ashobora gusinya mu ikipe yaho yitwa VDK Gent (La Gantoise) ya Volleyball mu gihe yaba abonye ibyangombwa byo kumurekura bya Rayon Sports yakiniraga. Mutoni yabwiye Umuseke ko ubu ibyo byangombwa aribyo ari kugerageza gushaka.

Adolphe Mutoni ni umukinnnyi wa Volleyball ukinisha imoso, ni umwe mu bakiniye ikipe y’igihugu mu minsi yashize, ubu yakinaga mu ikipe ya Rayon Sports.

Mutoni amaze ibyumweru bibiri akora imyotozo n’iyi kipe ya VDK Gent aho umutoza wabo ngo yashimye urwego ariho akamubwira ko bashobora kumuha amasezerano yo gukina igice (demi saison) gisigaye cya shampionat yaho kizarangira mu kwa gatandatu.

Ati “President wa equipe (Gent) yambwiye ko badashobora kunsinyisha nkifite amasezerano n’indi kipe.”

Kugeza ubu Mutoni ari kugerageza kuvugana n’ubuyobozi bw’ikipe ye ya Rayon Sports kugira ngo babe bamuha urwandiko rwo kumureka agakinira indi kipe.

Usibye shampionat yaho, ngo aramutse asinye yanakina andi marushanwa ya Volleyball yo mu Bubiligi arangira mu kwezi kwa cyenda.

Rayon Sports imaze kureka abandi basore nka Fred Musoni wagiye gukina mu ikipe ya Liiga Riento muri Finland na Nelson Murangwa wagiye gukina mu ikipe ya Middelfart muri Denmark bose bagiye mu mpera z’uyu mwaka iyi kipe ibarekuye.

Adolphe Mutoni nawe avuga ko nawe afite ikizere ko iyi kipe ye izashyigikira iterambere rye ikamureka akagerageza amahirwe mu Bubiligi.

Roben NGABO
UM– USEKE.RW