Ab’i Gitwe batanze ibitekerezo byabo ku kuvugurura Itegego Nshinga

Muri gahunda y’Inteko Nshingamategeko y’u Rwanda imitwe yombi yihaye yo gukusanya ibitekerezo by’abaturage ku guhindura ingingo ya 101 y’Itegeko nshinga, abaturage b’i Gitwe bagaragarije izo ntumwa za rubanda ko bifuza ko Perezida Kagame yakomeza kubayobora. Nta gitekerezo kinyuranyije n’ibi cyahatangiwe.

Mu ishuri rikuru ry’i Gitwe-ISPG intumwa za rubanda zashakaga kumva ibitekerezo by’abanyeshuri, abakozi, abayobozi b’ishuri n’abakozi b’Ibitaro bya Gitwe ku bijyanye no kuvugurura Itegeko Nshinga.

Batanze umwanya uhagije bumva ibitekerezo bya buri wese bijyanye n’ubusabe Abanyarwanda basaga miliyoni enye banditse amabaruwa basaba ko ingingo y’101 y’Itegeko nshinga yahinduka.

Depite Byabarumwanzi Francois wari uyoboye izi ntumwa za rubanda yabwiye abitabiriye ibiganiro ko hari bamwe bajya bavuga ko Inteko nshingamategeko nta burenganzira ifite bwo guhindura ingingo n’imwe mu zigize Itegeko nshinga, avuga ko baba bibeshya kuko ingingo y’193 ibisobanura neza.

Iyi ngingo ngo yerekana ko abadepite n’abasenateri bashobora guhindura Itegeko Nshinga ndetse ko na Perezida wa Repubulika ubwe abifitiye ububasha, ariko yongeraho ko ibyakorwa byose biba bigamije inyungu z’abaturage.

Ishuri rikuru rya ISPG nk’uko byasobanuwe n’Umuyobozi waryo Dr. Jéred Rugengande, abanyeshuri baryo n’abakozi bandikiye Inteko Nshingamategeko bifuza ko ingingo y’101 yavugururwa maze igaha amahirwe Perezida Paul Kagame yo kwiyamamariza manda itaha.

Yavuze ko bajya kubisaba by’umwihariko babitewe n’ubutwari bamubonamo bityo bakaba bifuza ko ayobora u Rwanda.

Abanyeshuri n’abakozi batanze ibitekerezo binyuranye bose bagaragaje ko ingingo y’101 ikwiye guhinduka.

Bamukunde Norbert we yaje avuga ko kuyihindura gusa abona bidahagije atanga igitekerezo cye avuga ko kuri we asanga Perezida Kagame ari umuntu ntagereranywa ndetse ahereye ku bitekerezo bye byiza mu miyoborere yibaza ko n’abo mu rugo rwe bafite ibitekerezo bimwe.

Ati: “Nkurikije agaciro umukuru w’igihugu afitiye igihugu cyacu, nifuza ko yategeka kugeza ku gisekuru cya kane, ni ukuvuga ko yayobora igihugu, umuhungu we akazayobora, umwuzukuru we akayobora no kugeza ku mwuzukuruza we.”

Ibitekerezo byatangiwe aha nta na kimwe kinyuranya n’ubusabe bw’abaturage bwo kuvugurura Itegeko Nshinga cyatanzwe.

Abadepite bamaze gukusanya ibitekerezo bya buri wese bijeje abitabiriye ibiganiro ko bagiye kubihuza n’iby’abandi Banyarwanda batanze maze Inteko Nshingamategeko imitwe yombi ikazicara ikarebera hamwe ibyufuzo by’Abanyarwanda niba koko byazashyirwa muri kamarampaka.

 Photos/Damyxon/UM– USEKE

Jean Damascene NTIHINYUZWA
UM– USEKE-RW-Ruhango