Abasenateri bose bemeye ishingiro ry’umushinga w’ivugurura ry’Itegeko Nshinga

Abasenateri 24 bari bateraniye mu cyumba cya Sena kuri uyu wa 05 Ugushyingo 2015, bose batoye  bemera ishingiro ry’umushinga wo kuvugurura Itegeko Nshinga. Nta wifashe cyangwa ngo awuhakane. Hon Makuza yasobanuye ko ubu bageze ku cyiciro cya 14 mu byiciro 19 umushinga w’ivugurura ry’iri tegeko Nshinga ugomba gucamo.

Umunyamakuru w’Umuseke wari mu Nteko aravuga ko ari gahunda yamaze umwanya muto, Abasenateri bicaye maze abasomye uriya mushinga bagenda batanga ibitekerezo ku ngingo zimwe na zimwe.

Abenshi bavuze bashima akazi kakozwe ngo babona ko hari byinshi byavuguruwe babona ko ari byiza kuko bishingiye ku busabe bw’abaturage.

Habaye impaka zisa n’izikomeye ku ngingo ya 79 ivuga ko manda y’imyaka 5 y’abadepite ifunguye, (itagira umupaka), ariko iya 82 y’uyu mushinga w’itegeko nshinga rivuguruye, igateganya ko Abasenateri batorerwa manda y’imyaka 5 yongerwa rimwe, mu gihe mu itegeko nshinga rivugururwa, Senateri yari afite manda y’imyaka ine yongerwa rimwe.

Bamwe mu Basenateri, mu mvugo yeruye banenze bikomeye impamvu abadepite bihaye manda ifite igihe kitazwi, ariko impaka kuri iyo ngingo ziza guhoshwa na Senateri Tito Rutaremara, washyigikiye igitekerezo cya Hon Mukama Abbas Visi Perezida w’Umutwe w’Abadepite, yavuze ko byakozwe bitewe n’uko Abadepite batorwa n’abaturage, Abasenateri bagashyirwaho.

Hon Ntawukuriryayo ati “Kuki mu Itegeko Nshinga baduhaye hagaragaramo uko Senateri avaho ariko ku badepite ntibigarukweho ngo bizagenwa n’Itegeko Ngenga rigenga umutwe w’Abadepite?”

Ibi byagarutsweho na Hon Karangwa Chrisologue, wavuze ko adahakana ko abadepite bamara imyaka itazwi, ariko ati “Birasaba ibisobanuro, kuko ntibyumvikana uko Abasenateri n’Abadepite, bose bari mu rwego rumwe rw’Inteko, ariko bamwe itegeko rikavuga uko bavaho, abandi bikagenwa n’itegeko ngenga.”

Senateri Mukankusi, we yavuze ko mu gihe Senateri azaba ahawe manda y’imyaka 5, bishobora kwica inshingano z’urwego akorera bitewe n’icyo gihe gito, asaba ko nibura haba manda y’imyaka 10 wenda itongerwa kugira ngo Sena ikore inshingano yahawe muri icyo gihe.

Tito Rutaremara, wari wagaragaje ko ashyigikiye ishingiro ry’uyu mushinga, nubwo yaneze uko ingo ya 172, ivuga manda y’imyaka 7 izahabwa Perezida uzatorwa muri 2017, hakazabona gukurikizwa ibyo mu ngingo 101 ivuga manda y’imyaka 5 ku Mukuru w’Igihugu, yahosheje izo mpaka.

Ati “Kuba abadepite batorerwa imyaka 5 muri manda ifunguye, abanyamakuru ntibabitware nabi niko itegeko ribiteganya. Abadepite bshyirwaho n’amashyaka yabo, ndetse batorwa n’abaturage, bityo igihe bakimufitiye icyizere ishyaka ryamugumishaho, cyangwa yarangiza manda abamutoye bamugirira icyizere akagumaho.”

Hakurikiyeho amatora maze, Abasenateri 24 bose bari bahari batora bemera ishingiro ry’uyu mushinga wo kuvugurura Itegeko Nshinga hashingiwe ku busabe bw’abaturage bakoze kuva hagati muri uyu mwaka bakabugeza ku Nteko.

Hon Bernard Makuza uyoboye Sena y’u Rwanda yavuze ko muri ‘etapes’ (ibyiciro) 19 iri vugurura rigomba kunyuramo ubu bageze nibura kuri ‘etape’ ya 14.

Uyu mushinga ugiye gushyirwa muri Komisiyo ya Politiki n’imibereho myiza y’abaturage, muri Sena bawusuzume. Aha ngo n’Abadepite hamwe n’undi Munyarwanda wese azaba yemerewe kwitabira iri suzuma rizakorwa n’iyi Komisiyo.

Komisiyo nimara gukora isuzuma, mushinga uzagaruka mu Nteko rusange ya Sena maze hagende hatorwa ingingo ku yindi.

Nibirangira uyu mushinga wemejwe, uzajyanwa mu Nteko rusange Umutwe w’Abadepite, aba ngo bashobora gusanga hari ingingo zahindutse, aba ngo basanze hari ingingo batemeye hajyaho Komisiyo ihuriweho n’imitwe yombi yo kongera kubyigaho, zagafatwaho umwanzuro.

Umutwe w’Abadepite niwemera ibyakozwe na Sena kuri uyu mushinga, uzabimenyesha Sena mu nyandiko maze  ushyikirizwe Minisitiri w’Intebe, na we n’Inama y’Abaminisitiri basabe Perezida wa Repubulika kugena igihe Kamarampaka izabera.

Gusa, Perezida wa Republika n’abajyanama be, na bo ngo bashobora kuvuga bati “Ingingo iyi n’iyi turabona ishobora kunozwa muri ubu buryo”.

Icyo gihe uyu mushinga wongera kugaruka muri Sena n’Inteko y’Abadepite hakanozwa ya ngingo yasabwe na Perezida wa Republika mbere y’uko habaho Kamarampaka abaturage bagatora. Nyuma ya Kamarampaka, itegeko risinywa na Perezida rikajya mu Igazeti ya Leta hakubahirizwa ibirimo.

Uyu mushinga wo kuvugurura Itegeko Nshinga rya Repubulika y’u Rwanda ryo ku ya 4 Kamena 2003 nk’uko ryavuguruwe kugeza ubu, ugizwe n’ingingo 177 mu gihe itegeko nshinga ryagiraga 203. Kuvugurura itegekonshinga nibikorwa, rizaba rivuguruwe ku nshuro ya gatanu muri rusange, ariko nibwo bwa mbere bizaba binyuze muri Kamarampaka.

Ange Eric HATANGIMANA
UM– USEKE.RW