Abanyarwanda babona bate gufasha umurwayi ubishaka gupfa aho kubabara

Mu Rwanda ibitekerezo byinshi ubu biri kugaruka kuri mandat ya gatatu y’umukuru w’igihugu. Ibyo ariko ntiwakongera kubitindaho ugeze kwa muganga ukabona abarwayi baryamye ku bitanda bagera ku 10 bategereje urupfu mu bubabare bukomeye. Wakwibaza ahubwo niba badashobora gufashwa kurangiza ubuzima bwabo batababaye kugeza igihe batazi.

Umunyamakuru w’Umuseke yatembereye mu bitaro bitatu bikomeye byo mu Rwanda mu mezi atatu ashize, abona abarwayi barembye, bababara kandi babwiwe ko bagomba gutegereza urupfu kuko nta kundi kuvurwa gushoboka bitewe n’indwara barwaye aho igeze.

Aba ni ababoneka kuko hari n’abasezererwa bakajya gutegerereza urupfu mu miryango yabo kugira ngo nibura ibitanda baryamyeho kwa muganga babiveho bijyeho abandi bashobora kuvurwa bagakira. Ibi ni ibyemezwa na bamwe mu baganga.

Imiryango y’aba barwayi iba ikomerewe ku buryo idashobora gutekereza ibya mandat ya gatatu cyangwa guhindura itegeko nshinga bishyushye ubu. Ibitekerezo byabo n’ubushobozi bwabo biba biri ku rupfu, intimba n’agahinda biba bibashengura imitima kubwo kubura umuvandimwe, umubyeyi cyangwa inshuti bamureba ababara badafite icyo babikoraho ndetse batanumvikana n’urupfu ngo nibura rutebuke.

Mu bihugu bimwe na bimwe biteye imbere ‘debat’ yabaye ndende hagati y’abemerera ko umuntu urwaye utakibashije kuvurwa kuba yafashwa kurangiza urugendo rw’ubuzima bwe n’ababona ko ari icyaha, ubwicanyi cyangwa se kunyuranya n’ugushaka kw’Imana. Muri bimwe mu bihugu bageze ku kumvikana hamwe bemeza ko bikorwa ahandi ntibabyemeza.

Mu Rwanda, birumvikana ko bitewe n’urwego rw’imitekerereze y’abagize societe yacu, igihe cya ‘debat’ nk’iyi gishobora kuba kitaragera neza, abantu benshi bahangayikishijwe no kubona icyo kurya, aho kuba, akazi n’ibindi by’ibanze. Ibi iyo bibonetse nibwo usanga abantu bajya muri ‘debat’ za politiki cyangwa iz’umupira w’amaguru n’izindi zikora ababonye iby’ibanze bakeneye.

Nubwo hataragera ariko iyo amagara atewe hejuru buri wese arikanga, agatekereza cyane ku ye.

Ubu fata akanya utekereze ku y’abandi, barembye, batakivurwa atari uko habuze ubushobozi ahubwo kubera indwara aho yageze bikarenga ubushobozi bwa muganga akakubwira ko utegereza urupfu mu bubabare kenshi bukomeye.

Umuseke waganiriye n’abantu batandukanye ku kuba umuntu urwaye urembye utakivuwe itegeko ry’u Rwanda (ntarihari ubu) ryamwemerera gufashwa kurangiza urugendo rw’ubuzima bwe ku bushake bwe atarinze gutegereza urupfu mu bubabare.

Umuturage wa Nyarugenge witwa Jean Michel Bagiraneza yahuye n’iki kibazo, avuga ko umubyeyi we yapfuye muri ubu buryo nyuma y’ubububabare bukomeye yamazemo amezi arindwi, kwa muganga baramusezereye kubera Cancer y’umwingo yari yararengeranye.

Ati “Sinifuza ko hari undi muntu byagendekera uko byagenze kuri mukecuru. Yarababaye bikomeye cyane kugeza apfuye. N’ubu nanjye numva byarankomerekeje umutima. Ibi nabitekerejeho (gufasha umuntu kurangiza ubuzima) cyane ndetse nanabisabye abaganga bambwira ko mu Rwanda bidashoboka. Ariko njye nsanga bikwiye kuko njyewe nageze aho numva ari uburenganzira bw’umuntu baba bamwimye.”

Kimwe n’abandi bantu bagera kuri 15 baganiriye n’Umuseke kuri iyi ngingo bemeje ko ubu ari uburenganzira umuntu akwiye kwemererwa aho kubabara kugeza ku rupfu atazi igihe ruzazira.

Aba bashingira ku kuba niba umuntu (muganga) yemera ko hari aho ubushobozi bwe bugarukira, ko hari aho indwara igera ikaba idashobora kuvurwa, bikwiye ko muri icyo gihe umurwayi ubishaka kandi ubyiteguye ashobora gufashwa gupfa aho kubabara by’igihe kitazwi ategereje gupfa.

Abatemeranya n’ibi nabo baganiriye n’Umuseke, ingingo zabo ahanini bazishingira ku iyobokamana, ikintu gikomeye mu mitekerereze n’imigirire y’abagize societes nyinshi muri Africa.

Kanziga Venantie wo mu karere ka Gasabo yabwiye Umuseke ko ubuzima butangwa n’Imana bukisubizwa n’Imana bityo we asanga nta muntu ukwiye kwambura undi ubuzima ngo ni uko abishaka.

Kimwe n’abandi bagenzi be bashingira ku myemerere bavuga ko ubu buryo bwo kurangiza ubuzima bw’umuntu ku bushake budakwiye kuko basanga ari nk’ubwicanyi cyangwa se kwiyahura, bakaba kandi ari icyaha.

Brandine Kayitesi umucuruzi ku Kimironko waganiriye n’Umuseke we avuga ko Imana isubiriza mu kwiheba no mu kudashobora kwa muntu. Akaga ko no mu gihe umuntu aba ari guhabwa ubufasha bw’ibanze ategereje gupfa (palliative care) Imana ngo ishobora kuba ari aho izanira igisubizo, bityo gufasha umuntu gupfa yumva bidakwiye nubwo yaba ababara bikabije.

N’abaganga ntibabivugaho rumwe

Abaganga Umuseke wasanze mu mirimo yabo mu bitaro bya Leta bavuga ko batemerewe kuvugira ibi bigo, bemeye gutanga ibitekerezo byabo ariko ntibatangazwe imyirondo. Umwe muri bo ukora ku bitaro bya CHUK yabwiye Umuseke ko mu myaka 25 amaze mu buganga yahuye na ‘case’ nk’izi zirenga iyo myaka amaze mu kazi, z’aho umurwayi abwirwa ko nta kindi ubuvuzi ubwo aribwo bwose bwamukorera uretse kumufasha kumwitaho mbere yo gupfa.

Gusa uyu akavuga ko we asanga bidakwiye ko umuntu ubuzima bwe bwarangizwa kubera ko ari ko abyifuza.

Ati “Biragoye cyane nka hano mu Rwanda.Biriya hari uburyo bwinshi bikorwamo, hari inzira ndende z’amategeko kugira ngo byemezwe, hari n’imyumvire ya ‘communaute rwandaise’ (abanyarwanda), hari utuntu twinshi dutuma umwanzuro nk’uriya mu Rwanda ugoye kuba wakwemezwa. Nkanjye nanjye mbona ko ari ubwicanyi, nka muganga mfasha umuntu gukira sinamufasha gupfa.”

Uyu muganga atanga urugero nko kuba mu bindi bihugu byemera ko ibi bikorwa nk’Ubusuwisi, Ububiligi na Leta zimwe na zimwe mu zigize USA, n’ubu hakiri ‘debat’ zikomeye ku kuba umurwayi wemera gufashwa gupfa uko aba ameze mu mutwe kuko ngo amategeko abigenga asaba ko ubikorerwa ari we ufata icyemezo kandi akabyemera mu mutwe ari muzima wo gufata uwo mwanzuro (mentally competent). Uyu muganga akavuga ko nko mu Rwanda ibi byateza ibibazo bikomeye.

Amakuru atangazwa na RFI avuga ko mu mwaka ushize hari abarwayi barenga 100 bagiye cyangwa bajyanywe mu Busuwisi bagamije gushaka uburenganzira ku rupfu bwemerwa muri kiriya gihugu ku murwayi ubikwiye.

Undi muganga wo ku bitaro bya CHUB i Butare we asanga bikwiye ko umuntu ugeze aho ubuganga bwemera ko adashobora kuvurwa kandi ari mu buribwe bukabije, we abyemera n’umuryango we (abana be cg ababyeyi be gusa) ubyemera, nta mpamvu yo kwima uburenganzira umurwayi bwo kurangiza ubuzima bwe.

Ati “Ni debat ndende itaragera mu Rwanda, ariko njye nsanga iri simple(yoroshye). Ahubwo debat yakabaye uburyo bikorwamo, uwo bikorerwa n’amategeko abigenga. Njye numva umuntu yafashwa kuva mu bubabare bukabije agahabwa urupfu rutuje bikwiye, aho kumureka agasambagurika mu buribwe amezi n’amezi akazicwa n’agahinda n’ububabare.”

Ubwanditsi
UM– USEKE.RW