Abanyarwanda 35 batahutse, 15 bavumbuwe ko bashakaga kwiyita impunzi

Mu nkambi yakira impunzi ya Nyarushishi hakiriwe Abanyarwanda 45 batahuka bava muri Repubulika iharanira Demokarasi ya Congo, aho aba Banyarwanda bavuga ko bari babayeho nabi, ariko hari 15 bavumbuwe bari baratahutse basubira muri Congo bashaka guhabwa imfashanyo igizwe n’amadolari baha buri muntu.

Mu gikorwa cyatangijwe n’Umuryango Mpuzamahanga wita ku Mpunzi (UNHCR) cy’uko Umunyarwanda wese utaha azajya ahabwa Amadorali ya Amerika 250 ku muntu mukuru ndetse na $ 150 ku mwana, hari Abakongomani batahuwe ko biyitaga impunzi kandi atari zo.

Aba Banyarwanda batahutse ejo ku wakane muri 45, hafashwe 15 batari batahutse kuko bafashwe n’uburyo bushya bw’ikoranabuhanga bwa finger Print bagaragaza ko bari baratashye bakongera bagasubirayo.

Minisitiri ufite Impunzi mu nshingano ze, Seraphine Mukantabana yadutangarije ko aba bashaka kwiyita impunzi bwa kabiri ari ubusambo bubi.

Ati: “Ikoranabuhanga ryarabikemuye, umuntu wese ufite icyo gitekerezo namubwira akabireka kuko ni igikorwa gihanwa n’amategeko, uwaba yabitekerezaga azahomba kurusha uko yabyungukiramo.”

Aba Banyarwanda batashye bavuye mu duce twa Masisi, Karehe na Walekare bazahita bafashwa kugezwa mu miryango yabo nyuma y’iminsi ibiri bakiriwe dore ko buri wese azajya anahabwa telephone izajya imufasha kubona amafaranga yagenewe.

Umuntu mukuru azajya ahabwa amadorali ya Amerika 250 anagana Frw 205 000 naho umwana ahabwe $ 150 angana Erw 123 000, uyagenewe arayahabwa, ufashwe ko yakoraga makanaki (yabeshyaga) agasubizwa iwabo amara masa.

Francois Nelson NIYIBIZI
UM– USEKE.RW