Abantu 5 bashobora kwicwa kuko ‘bishe Jamal Khashoggi’

Ubwami bwa Arabia Saoudite bwatangaje uyu munsi ko abantu batanu bashinjwa uruhare mu kwica umwanditsi Jamal Khashoggi nabo bashobora guhanishwa igihano cy’urupfu, aba ntibatangaje abo ari bo.

Ubushinjacyaha bwaho bwatangaje ko abantu 11 bagejejwe imbere y’Urukiko nubwo butatangaje imyirondoro yabo, mbere ubu bwami bwari bwatangaje ko abantu 18 aribo bafashwe.

Jamal Khashoggi yandikaga inyandiko zirwanya Igikomangoma Mohamed Bin Salman cya Arabia Saoudite zigaca mu kinyamakuru Washington Post.

Iki gikomangoma nicyo gishinjwa kuba inyuma y’urupfu rwa Jamal Khashoggi nubwo cyahakanye ko ntaho gihuriye narwo.

Ubushinjacyaha muri iki gihugu bwatangaje ko buri gusabira “igihano cyo kwicwa abaregwa batanu kubera uruhare rwabo rutaziguye mu rupfu rwa Jamal Khashoggi.”

Ubwami bwa Arabia bwari bwabanje guhakana ko Jamal Khashoggi yiciwe mu biro bihagarariye ubu bwami muri Turkiya, nyuma bwaje kubyemera.

Haracyari ibibazo hagati ya Arabia na Turkiya ku gutanga ibimenyetso ku rupfu rwa Jamal Khashoggi.

Ibinyamakuru muri Turkiya byagaragaje amashusho y’abantu bakikije Mohamed Bin Salman bari kuri Consulate ya Arabia i Istanbul igihe cyo kwica Khashoggi, bamaze igihe gito bahaje kandi bagahita bahava birangiye.

Umubiri wa Khashoggi ntiwigeze uboneka kugeza ubu, bikekwa ko wacimbaguwemo ibice, nyuma bikagirwa umuyonga hakoreshejwe acide.

Khashoggi yinjiye muri iriya nzu tariki 02 Ukwakira 2018 agiye kwaka ibyangombwa ko yatandukanye n’umugore we kugira ngo abashe gushyingiranwa n’undi wari unamuherekeje amusize hanze ya consulat.

UM– USEKE.RW