Abantu 4 bishwe mu mpanuka zo mw’ijoro rya Noheli

Impanuka zigera kuri esheshatu nizo zaba zarabaye mu ijoro rya Noheli mu gihugu hose, abantu bane bazitakarijemo ubuzima nkuko byemejwe na Police.

Babiri mu bishwe n’izi mpanuka baguye mu mujyi wa Kigali ubwo moto yagwaga mu ikona ku muhanda wa UTEXRWA igahitana umumotari n’uwo yari itwaye ako kanya.

Abantu umunani batawe muri yombi ahatandukanye mu gihugu bazira gutwara imodoka basinze, batandatu muribo bafatiwe mu mujyi wa Kigali.

Iki cyaha kikaba ubusanzwe gihanishwa amande y’ibihumbi 180 000Frw n’igifungo cyo kugeza igihe uwari utwaye yongeye kumera neza.

Abantu 15 biganjemo urubyiruko batawe muri yombi mu mujyi wa Kigali kubera ubusinzi bukabije mu ijoro rya Noheli.

Umuvugizi wa Police Theos Badege, yavuze ko nubwo hari amwe mu mabi yabaye mu ijoro rya Noheli, muri rusange umutekano wifashe neza kuri uwo mugoroba wa Noheli ndetse no muri iyi minsi mikuru kugeza ubu, ugereranyije n’umwaka ushize.

Badege akaba avuga ko ibi babikesha gukangurira abantu kwitwararika ndetse no kuba harashyizwe abapolisi benshi ku mihanda muri iki gihe cy’impera z’umwaka.

Kugeza mu mpera z’ukwezi kwa 11, impanuka 4 000 nizo zari zimaze kubarwa mu gihugu hose, izi zaguyemo abantu bose hamwe 355.

Badege akaba yavuze ko impanuka nyinshi zatewe n’uburangare, umuvuduko ukabije, ndetse no gutwara banyoye inzoga.

Umuvugizi wa Police akaba kandi yanasabye abanyatubari kwirinda guha inzoga abana batagejeje ku mwaka 21 y’amavuko.

Source: Newtimes

Jean Paul Gashumba
UM– USEKE.COM