Abakorera mu isoko rishya rya Nyarugenge basabwe guhagarara

Umujyi wa Kigali wasabye ko abari gukorera mu isoko rishya rya Nyarugenge baba bahagaritse imirimo yabo mu gihe cyose batarabona uburenganzira bwo gukoreramo (Permis d’occupation).

Nkuko twabitangarijwe n’ushinzwe itangazamakuru mu mujyi wa Kigali, Bruno Rangira, nyuma y’igenzura ryakozwe n’umujyi, basanze iyi nyubako itararangira neza hari ibigishyirwamo, nyamara ngo bamwe bo batangiye gucururizamo.

“Mu rwego rwo kwirinda ikitagenda neza gitewe n’uko iyi nyubako itaruzura neza, twasabye ba nyiri iyi nzu kuba bahagaritse ibikorwa byo gucururizamo, bakabanza kandi bakabona Permis d’occupation” Bruno Rangira

Iri soko rishya rya kijyambere ryubatswe n’urugaga rw’ abashoramari bo mu Mujyi wa Kigali (Kigali Investment Company – KIC), ari narwo rukodesha abari bari kurikoreramo nirwo rwasabwe kubahagarika, ndetse bigakorwa mu gihe cya vuba.

Umwe mu baricururizagamo utashatse ko twandika amazina ye, yabwiye UM– USEKE.COM ati: “Iki ni icyemezo kidutunguye, kuko kuva mu ntangiriro z’uku kwezi gushize (Werurwe) twari twaratangiye gucuruza abantu bamaze kuhamenyera, ubu se biragenda bite? Turajya he?”

Uyu mucuruzi ariko akaba yemera ko koko iyi nyubako bakoreramo itari yuzura neza kuko ngo muri etages nyinshi hakiri imirimo yo kunoza inyubako igikorerwamo.

Tubajije Bruno Rangira wo mu mujyi wa Kigali impamvu baretse abacuruzi bagatangira gucururiza muri iyi nyubako nta mpushya babifitiye, yavuze ko nta gihe kinini baramara bacururizamo, ko babonaga abantu bashyiramo ibintu bakagirango ni ukwitegura gutangira ariko nyuma y’igihe gito batangira no gucuruza.

Bruno Rangira ati: “ Twahise twohereza abagenzuzi ngo barebe niba inzu yakomeza gucururizwamo, bemeza ko bidakwiye kuko itaruzura neza, ariko kandi ko bikwiye ko ucururizamo ahabwa impapuro zibimwemerera mu rwego rwo kwirinda akajagari”

Abacururiza hasi (kuri niveau ya mbere) bacuruza imboga n’ibindi biribwa, nibo gusa bahawe igihe gito cyo kubanza kumara ububiko (stock) bwabo, maze nabo bagahagarara nkuko byemezwa na Bruno Rangira.

Mu ntangiriro z’uyu mwaka, umushoramari Paul Karangwa, uhagarariye KIC (Kigali Investment Company) ba nyiri iri soko, yari yatangarije izuba rirashe ko iri soko rizaba ryuzuye neza neza tariki ya 15 Werurwe 2012, kubera ko hari utuntu bari bakirimo kunoza gusa n’ubu utwo tuntu turacyari kunozwa.

Iri soko rya kijyambere, rizuzura neza ritwaye akayabo k’amafaranga y’u Rwanda abarirwa hagati ya Miliyari icyenda n’icumi z’amanyarwanda.

Jean Paul Gashumba
UM– USEKE.COM