Abakinnyi 5 Chelsea yashyize muri gahunda yayo yo guhaha

Umutoza wa Chelsea Andre Villas-Boas muri iyi minsi ikipe ye itarimo kwitwara neza, ahanini kubera abakinnyi bamwe nabamwe bagenda bagaragaza integer nke. Izo mpanvu nizo zatumye ngo niba atirukanywe aza kwivovota ku isoko ry’abakinnyi mu kwambere umwaka uje.

Aba bakinnyi batanu ngo nibo agomba kuzana byihutirwa kugira ngo agume muri   Kurusu (course) y’igikombe cya Premier Ligue.

1. Gary Cahill – Agaciro: £8million

Cahill ni umukinnyi w’umwongereza, wavutse ku itariki ya 19 Ukuboza muri 1985, akaba akinira ikipe ya Bolton Wanderers, n’ikipe y’igihugu y’ubwongereza “three lions”.

Mu gihe Chelsea yaba ibonye uyu mukinnyi, yazaba umusimbura mwiza wa John Terry cyangwa Alex, mu gihe bakomeje kugaragaza intege nke mu kibuga nk’iza Sekarongoro (z’ubusaza)

2. Bruno Cortez – Agaciro: £15million

Bruno Cortez yavutse tariki ya 11 Werurwe 1987, akomoka mu gihugu cya Brazil, akaba akinira ikipe ya Botafogo mu mujyi wa Botafogo, hafi ya Rio de Janeiro muri Brazil. Umutoza AVB yagaragaje ko akeneye bidasubirwaho uno mukinnyi ukiri muto. Mu gihe baba babonye uno mukinnyi, Chelsea yaba ikemuye ikibazo cya Ashley Cole nawe ngo utorohewe muzabukuru.

3. Josip Ilicic – Agaciro: £21.5million

Uyu mukinnyi w’umunya Slovenia, yavutse tariki ya 29 Mutarama 1988, akaba akinira ikipe ya Palermo, mu gihugu cy’Ubutariyani. Ubwo Chelsea yaherukaga gushakisha uyu mukinnyi, Palermo yari yavuze ko atari ku isoko.

Palermo ariko muri Mutarama ishobora kwisubira ku kavagari kazaba gatangwa na Chelsea ubwo isoko ryo kugura no kurisha abakinnyi rizaba ritangiye. Chelsea iramutse iguze ‘Jojo’, yakongera imbaraga muri ba rutahizamu bari guhomberwa na Torres n’izabukuru za Drogba, agafatanya na Sturidge bikigero cye.

4. Emmanuel Frimpong – Agaciro: £10million

Emmanuel Frimpong ukomoka muri Ghana, yavutse tariki ya 10 Mutarama, muri 1992, akinira Arsenal. Uyu mwana Chelsea yagaragaje ko imwifuza cyane kuko ibona ko mugenzi we basangiye igihugu Michael Essien, akomeje kugenda yibasirwa n’imvune z’urudaca.

Uyu mwana rero ashobora kumubera umusimbura mwiza, aramutse aguzwe gusa ngo bitegure kumutangaho menshi kuko Arsenal nayo imukunze.

5. Lucas Ocampus – Agaciro: £14million

Ocampus ni umwe muri barutaha izamu, ukina ku ruhande rw’ibumoso, yavutse tariki ya 11 Nyakanga mu mwaka wa 1994 mu gihgu cy’Argentine, akaba akinira ikipe ya Atlético River Plate, muri Argentine.

Nubwo ikipe akinira yavuze ko uyu mukinnyi ari ndakorwaho, ariko amafaranga ya Chelsea nayo ni ndakumirwa.

Gael Nkubito
UM– USEKE.COM