Abajura babiri bafatiwe mu cyuho i Gikondo bibisha imbunda

Police y’u Rwanda kuri iki cyumweru yerekanye abajura babiri yafashe kuwa gatanu nimugoroba bibisha imbunda yo mu bwoko bwa Pistoret, aba bari baje kwiba sosiyete y’Abahinde ikorera i Gikondo ariko bisanga bafungiranywe mu gipangu bibiyemo, umwe aracika babiri bafatanwa miliyoni 5,6 z’amanyarwanda bari bamaze kwambura abahinde ku ngufu.

Abafashwe ni uwitwa Ali Bahizi alias Ninja na Amri Rugerinyange wari ubatwaye mu modoka.

CSP Celestin Twahirwa yabwiye itangazamakuru ko aba bajura binjiye muri iyi sosiyete ari babiri umushoferi wabazanye agasigara mu modoka aho mu gipangu gikoreramo abahinde.

CSP Twahirwa avuga ko batangiye kubaza aba bahinde uko ibicuruzwa byabo bigahaze nk’abakiliya basanzwe, maze muri ako kanya bagahita babafaitaraho imbunda bakabaka amafaranga yose bafite.

Bakusanyije miliyoni eshanu n’ibihumbi magana atandatu y’u Rwanda maze basohotse basanga abarinda iki kigo bamaze kubimenya bafunga umuryango imodoka ibura uko isohoka ndetse batabaje Police ihita ihagera, umwe yabashije gusimbuka urupangu aracika abandi bafatanwa amafaranga n’imbunda.

Umwe mu bahinde bari bahuye n’akaga yatangaje ko byari ahagana saa munani z’amanywa, maze babona abakiliya binjiye ariko bagitangira kubabaza bahita babafatiraho imbunda babaka amafaranga yose bafite.

Ati “Maze imyaka  15 mu Rwanda ariko ni ubwa mbere ibintu nk’ibi nari mbibonye.

Umwe yinjiye muri office yacu nk’umukiliya usanzwe, tumuha ikaze atubaza ibyo ashaka kugura, nyuma mugenzi we nawe arinjira bahita badutunga imbunda.

Nawe urabizi iyo umuntu agutunze imbunda, nta kindi uvuga, bati ‘muceceke, muzane amafaranga. Bafungura ibintu byose bafata ahantu hose dushyira amafaranga batwara arenga  miliyoni eshanu.

Barangije banyatse urufunguzo kugira ngo badukingirane muri office bagende, nanjye mba nabibonye mbabwira ko urufunguzo ntarwo njye mba mfite ruba rufite secretaire wanjye hasi…barihutaha maze bahita basohoka bajya kumureba ariko basanga ntawuhari ariko natwe duhita dufunga.”

Umuvugizi wa Police avuga ko Police abakozi ba sosiyete ya RGL irinda umutekano kuri aba bahinde bahise bamenya ibyabaye, maze bafunga igipangu ku buryo nta modoka isohoka ubundi batabaza Police.

Aba bajura bakije imodoka ngo basohoka basanga umuryango (gate) urafunze Babura uko basohoka kandi induru zivuga impande zose maze bashya ubwoba, umwe muri bo ahita asimbuka igipangu aracika nk’uko CSP Twahirwa abisobanura.

Police yahise ihagera maze ita muri yombi aba babiri bari basigaye, amafaranga yose bakiyafite ndetse n’imbunda ya Pistoret bibishaga.

CSP Twahirwa ati  “Aba bahisemo nabi, batekereje ko bashobora gufata ibya rubanda bakabirya babibambuye ariko ibi ntibyabahiriye. N’undi wese wabigerageza yamenya ko Police iri maso.”

Aba bagabo bashobora guhanishwa ingingo ya 302 yo mu gitabo cy’amategeko ahana mu Rwanda, iteganya igihano kuva ku myaka ibiri y’igifungo kugera kuri itanu n’ihazabu ingana n’ibyo bari bibye byikubye ishuro eshanu kugera ku 10 bitewe n’ibyagenwa n’umuvamanza.

Umwe muri aba bahinde babiri bari bibwe yagize ati “Turishimye kandi turashimira Police, amafaranga yacu yose twayasubijwe….mu Rwanda ni ahantu heza ibintu byose hano mu Rwanda ni amahoro, hano dufite amahoro rwose n’ibintu byacu birarinzwe.”

Nta mbunda ziri mu baturage – Twahirwa

CSP Twahirwa avuga ko nubwo ubujura nk’ubu muri iki gihe budasanzwe mu Rwanda ariko ngo muri rusange nta mbunda zikiri mu baturage, gusa ngo birashoboka ko hari umwe babiri ushobora kuba yarayibitse akayikoresha mu bikorwa nk’ibi bibi.

Ati “Ubu tugiye gukora iperereza turebe inkomoka y’iriya mbunda. Kuko nka Bahizi uriya wafashwe asanzwe afite records zo kuba yarigeze kujya mu bikorwa by’ubujura kuko asanzwe akurikiranwa, ni umuntu ufite amateka mabi na mbere.”

Photos/JP Nkundineza/UM– USEKE

Jean Paul NKUNDINEZA
UM– USEKE.RW