Abahohotewe n’inyamaswa zo muri Pariki bagiye guhabwa impozamarira

Byemejwe kuri uyu wa gatanu ubwo kuri Telecom House ku Kacyiru ikigo gishinzwe iterambere RDB n’ikigo gishinzwe kugoboka abononewe  (Special Guarantee Fund) byahererekanyije amadosiye y’abagomba guhabwa izo mpozamarira.

Abagomba guhabwa izi mpozamarira ni abaturage bangirijwe n’inyamaswa, bakomerekejwe cyangwa bimuwe n’ibikorwa byakorewe muri Pariki z’Akagera, Nyungwe n’Ibirunga.

Ku kibazo cy’uko aba bantu batinze guhabwa impozamarira zabo, Madame Rica Rwigamba uhsinzwe iby’ubukerarugendo muri RDB yavuze ko byatinze kuko bitari gukorwa bidakurikije itegeko ryari ritaratorwa.

Yavuze ko abagomba guherwaho bahabwa impozamarira, ari abangirijwe ibyabo mbere y’abandi hakurikijwe igihe bagiye babibemenyeshereza ubuyobozi.

Bernardin Ndashimye uyobora iki kigo gishinzwe kugoboka abononewe n’inyamaswa we yatangaje ko mu mateka y’u Rwanda ari ubwa mbere umunyarwanda agiye kwishurwa na Leta ibyangijwe n’inyamaswa. Bityo ko ari amateka mashya yagomba ga kwitonderwa mu gushyira mu bikorwa

Yagize ati: “Twajyaga dusaba abantu gukunda inyamaswa no kuzibungabunga ariko tukirengagiza ko nazo hari igihe zitaborohera, zikabangiriza. Ni igihe rero cy’uko Leta ibariha ibyo nazo zabangirije kuko zo zitakwshyuzwa ibyo zangije”.

Ibigega byo gutanga bene izi ndishyi, henshi mu bihugu bya Africa ngo byagiye bifunga imiryango. Ubuyobozi bw’iki kigega na RDB bemeza ko bazakora ibishoboka iki kigega kikagumaho kandi ntigihombe, mu gihe cyose bazaba bafatanya n’abaturage mu kubungabunga ubuzima bw’urusobe rw’ibibakikije rwinjiza amafaranga avuye mu bakerarugendo.

Abazishyurwa ku ikubitiro ni abangirijwe n’inyamaswa bakabigeza ku buyobozi bikandikwa bigashyingurwa neza. Naho ababimenyesheje ubuyobozi ntibubyemere bo ntibajurire ngo ibi ntibizagarukwaho.

Gahunda yo gutanga impozamarira izahera ku batuye i Rwimbogo mu ntara y’Iburasirazuba ahazatangwa impozamarira ku bagera ku 133, hari abadni baturiye Pariki y’Akagera nabo bagera kuri 306 ibirego byabo bizasubizwa, abagera kuri 34 baaturiye pariki ya Nyungwe ndetse na 14 baturiye pariki y’Ibirunga.

Amafaranga azajya akoreshwa muri iki kigega kitaratangira imirimo yacyo neza, ni azajya ava mu bukerarugendo bw’u Rwanda agera kuri 5%, nk’uko itegeko rya Minisitiri w’Intebe ryashyizeho iki kigega ryabigennye.

Daddy Sadiki RUBANGURA
UM– USEKE.COM